Octaviano Thal, negosiante nuu ne’ebé hetan agresaun fízika hosi membru PNTL, domingu (23/05). Imajen/foti hosi Facebook.

DILI, 24 maiu 2021 (TATOLI)—Provedoria Direitu Umanu no Justisa (PDHJ sígla portugés), kondena asaun ne’ebé komete hosi membru Polísia Nasionál Timor-Leste (PNTL), liu-liu agresaun fízika hasoru sidadaun ne’ebé fa’an nú iha pontu entrada Tasi-tolu Dili, domingu (23/05).

PDHJ rekomenda ba Komandu Jerál PNTL, atu instaura prosesu dixiplinár ba membru ne’e, bazeia ba dekretu-lei númeru 44/2020, loron 7 outubru, ne’ebé aprova o Regulamento de Disciplina da Polícia Nacional de Timor-Leste no mós foti medida kautelár, hodi suspende membru ne’e durante prosesu investigasaun.

Notísia relevante:PN kondena aktu ajente polísia baku vendedór

Komunikadu ne’ebé Agência Tatoli asesu iha segunda ne’e, PDHJ simu no rejista ona kesar, relasiona ho asaun membru PNTL ne’ebé halo agresaun fízika hasoru sidadaun na’in-rua iha sábadu 22 maiu 2021 fatin Kuluhun no mós negosiante fa’an nú iha Tasi-tolu, iha domingu 23 maiu 2021.

PDHJ kondena asaun ilegál ne’ebé mak komete husi membru PNTL sira durante implementasaun Estadu Emerjénsia (EE).

Iha dekretu Prezidente Repúblika númeru 24 /2021, 28 abríl no lei  númeru 7/2021, 28 abríl ne’e klaru katak, iha artigu 6º 1. b) no h) mak deklara katak, Estadu emerjénsia ne’e la afeta, iha kazu balun, entre direitu sira seluk, mak direitu ba integridade fízika no direitu hodi la sujeita ba tratamentu ka kastigu kruél, dezumanu ka degradante.

Tuir termu hosi artigu 9º, 23º, no 30º Konstituisaun Repúblika Demokrátika Timor-Leste (KRDTL) mak konsagra katak, Timor-Leste vinkuladu hodi kumpre konvensaun-sira ne’ebé ratifikada ona, nune’e interpretasaun tenke bazeia ba Deklarasaun Universál Direitu Umanu (DUDU), no ema hotu iha direitu ba moris, liberdade, seguransa, integridade pesoál no labele hetan tratamentu dezumanu no degradante.

Konforme artigu 6º no 7º Paktu Internasionál kona-bá Direitu Sivis no Polítiku, ratifikadu hosi rezolusaun Parlamentu Nasionál númeru 3/2003,  katak, Estadu iha obrigasaun pozitiva, hodi garante indivívidu hotu-hotu nia direitu ba moris no hetan tratamentu ho umanidade no ho respeitu ba dignidade hanesan ema umana, evita tratamentu kruél, degradante no dezumanu.

“Liga ho kazu Kuluhun ne’ebé mak membru PNTL baku sidadaun uza supostamente telefone ba halo foto no vídeo, mak hamosu violasaun artigu 6º nº 2 hosi Dekretu Prezidente Repúblika númeru 24 /2021, 28 abril no Lei númeru 7/2021, 28 Abril mak prevee katak, Deklarasaun Estadu Emerjénsia la afeta ba liberdade espresaun no informasaun sidadaun-sira nian no mós negosiante iha Tasi-tolu, PDHJ sei loke prosesu investigasaun ba kazu ne’e,’’ Komunikadu ne’e haktuir.

Iha parte seluk, artigu 40 hosi KRDTL no artigu 19º DUDU mós defende katak, direitu ema hotu-hotu ba liberdade espresaun no informasaun, inklui liberdade hodi fó opiniaun no buka, simu no transmite  informasaun, ideia sira liuhusi meiu oi-oin.

‘’Iha medida ezekusaun ba deklarasaun EE mak estabelese iha artigu 21º kona-bá órgaun fiskalizadór ba kumprimentu medida-sira iha DG ida-ne’e mak forsa no serbisu seguransa, ajente vijilánsia epidemiolójika no sanitária, hodi fiskaliza kumprimentu ba órden-sira ne’ebé estabelesida iha DG ne’e,’’ subliña.

Nune’e mós estabelese prinsípiu jerál ne’ebé órgaun fiskalizadór-sira tenke respeita durante implementasaun EE mak hanesan prevee iha artigu 3 kona-bá prinsípiu ba legalidade katak, Órgaun no Serbisu-sira iha Administrasaun Públika responsável ba aplikasaun medida-sira ne’ebé temin iha DG, ida-ne’e atua tuir de’it Lei, tuir limite  podér-sira ne’ebé fó ba sira.

Alende ne’e, iha artigu 5 númeru 2 no 3 ne’ebé estabelese prinsípiu proporsionalidade no nesesidade katak, uzu forsa hodi impoen kumprimentu ba regra EE, autorizadu de’it bainhira labele uza ona meiu seluk no uza forsa sempre tau uluk mak intimasaun ba obediénsia ne’ebé hala’o ho forma reál no nesesáriu iha medida ezijidu ba kumprimentu devér legál.

PDHJ husu ba forsa seguransa atu uza meiu-sira hanesan negosiasaun, mediasaun, persuasaun no rezolusaun ba konflitu, bainhira hasoru situasaun konflitu iha terrenu no bele de’it uza forsa natón atu hamate risku ba ema seluk nia integridade fízika ka moris, bainhira medida-sira temi la-violentu durante konflitu esgotadu, hanesan garante iha dekretu lei númeru 43/2011, 21 setembru, rejime jurídiku uza forsa.

PDHJ sei haruka karta ba Primeiru Ministru (PM) hanesan Ministru Interior (MI), Komandante Jerál PNTL no haruka notísia krime ba Prokuradór Jerál Repúblika (PJR) ka Ministeriu Públiku (MP) relativu ho akontesimentu rua ne’e.

Jornalista: Nelson de Sousa

Editór: Cipriano Colo

1 KOMENTÁRIU

  1. AMi Jovem Sira husu ba PDHJ no organizaun sira ne’ebe mak atende hela irmaun ne nia kazu halo favor,,, Lori ida ba tribunal tanba aktus hanesan ne’e mosu bei-beik ona ba ami Jovem sira,,,,
    Se ita la prevene agora, loron ruma Jovem balun sei lakon sira nia vida tanba Inkapsidade husi Oknum balun…….
    Ami Jovem PresisaLia Los no Lei Ne’ebe Mak Justu iha Rai Doben Ida Ne’e…

HAKEREK NO HATÁN

Please enter your comment!
Please enter your name here