Prezidente Institutu Nasionál Seguransa Sosiál (INSS) Longuinhos Armando Leite. Imajen Tatoli/Nelson de Sousa.

DILI, 24 maiu 2021 (TATOLI)—Prezidente Institutu Nasionál Seguransa Sosiál (INSS), Longinhos Armando Leite, hateten iha ámbitu rejistu ba empregadór no traballadór (negosiante) sira-ne’e, INSS fó sai meiu atendementu iha parte rua (2) mak ba negosiante no kioske sira-ne’e rejistu iha dadeersan no ba empregadór sira iha lorokraik.

Notísia Relevante:  INSS rejista ona entidade empregadór no traballadór hamutuk 1.715

”Iha dadeersan, ami (INNS) atende uluk ba fakultativa negosiante, kioske, motorista sira no iha parte lorokraik nian mak atende fali ba empregadór (empreza) sira, atu nune’e bele evita ema halibur malu barak no ema bele kumpre distánsia sosiál no fíziku tuir medida prevensaun COVID-19 ne’ebé Governu liuhosi Ministériu Saúde fó sai,” Prezidente INSS ne’e hateten ba Agência Tatoli, liuhosi telefónika, segunda ne’e.

Ida-ne’e mak meiu ne’ebé INSS uza hodi implementa ba fatin rejistu nian iha edifísiu INSS nian, no meiu seluk mak INSS husu ajuda ba Polísia Nasionál Timor-Leste (PNTL) hodi kontrola no orienta no meiu seluk mak fahe númeru ba sira maibé sidadun sira laiha kosiénsia.

“Ami sempre apela ba sira bainhira hahú rejistu. To’o diretór ne’ebé toma konta ba COVID-19 nian mai no ami hato’o direta ba sira maibé ita-nia povu mak nune’e,” nia dehan.

Maske nune’e, INSS kontinua atende no apela ba empregadór no traballadór sira atu nafatin kumpre protokolu saúde hodi uza máskara, hand sanitizer no balun hahú kumpre dauduan ona distansiamentu sosiál no fíziku maske iha balun mak seidauk kumpre.

“Ida-ne’e mak realidade ne’ebé akontese ita-nia rain mak serka sanitária ba pandemia COVID-19 no dezastre naturál. Maibé, INSS kontinua atende sira,” nia dehan.

Notísia Relevante: Apoiu empregu, MSSI husu traballadór sira rejistu liuhosi karta eletrónika

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here