Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 21 maiu 2021 (TATOLI)—Institutu Nasionál Seguransa Sosiál (INSS, sigla portugés), to’o sesta (21/05) ne’e, rejista ona entidade empregadór, negosiante, no traballadór hamutuk 1.715 atu bele hetan apoiu hosi Governu liuhosi programa “apoiu ba empregu” iha situasaun kalamidade no serka sanitaria nia laran ne’e.

Notísia Relevante: Governu fó flesibilidade sidadaun asesu apoiu sosiu-ekonómiku iha ámbitu konfinamentu

“Atu informa katak to’o agora ita-nia etidade empregadór sira hamutuk 839 no ba fakultativa ba motorista, kioske, negosiante no seluk tan ne’ebé mai rejista iha INSS ne’e hamutuk 876, entaun ami rejista iha INSS ho totál hamutuk 1.715,” Prezidente Institutu Nasionál Seguransa Sosiál (INSS, sigla portugés), Longuinhos Armando Leite, hateten ba jornalista sira iha nia knaar fatin MSSI, Caicoli, Dili, sesta ne’e.

Hosi totál ne’e, nia informa, foin mak munisípiu Dili nian no ema hirak ne’e ba direta rejistu iha edifísiu INSS nian, maibé kona-ba rejistu liuhosi eletrónika ne’e seidauk tanba INSS nia foku dahuluk ne’e ba ema-ne’ebé rejistu direta no munisípiu seluk seidauk rekolla.

“Segunda (24/05) semana oin mak ami bele fó informasaun kompletu kona-ba totál ema rejistu iha munisípiu sira hira no rejistu liuhosi eletrónika ne’e hira ba públiku,” nia dehan.

INSS kontinua simu rejistu hosi entidade empregadór inklui negosiante sira to’o 27 maiu tanba tuir lei ne’ebé vigór hahú iha loron 4 maiu to’o 27 maiu, ne’ebé prosesu rejistrasaun ne’e sei la’o durante loron 15 nia-laran hodi halo rejistu ba empreza ka motrista tuan no foun dala ida.

Notísia Relevante: COVID-19, Governu kria medida neen fó apoiu ba empregu sira

“Ba motorista no taksista sira rejistu foun to’o 27 maiu, no ba sira ne’ebé tuan hanesan emprezariu no negosiante ne’ebé durante ne’e rejistu antes ona, INSS sei taka iha fulan juñu nia rohan. Tanba ne’e, ha’u apela ba emprezáriu no negosiante sira-ne’ebé seidauk rejistu katak mai rejistu, ho kritériu ba emprezáriu foun mak tenke prenxe formuláriu iha INSS ne’ebé ami prepara ona. Maibé, lori lista traballadór sira hotu, lori kartaun eleitorál inklui lori kontratu traballadór sira-nian hosi empreza,” Prezidente INSS ne’e hateten.

Bainhira kritériu hirak ne’e mak loos ona no rejistu ona iha sistema, nia dehan, sira sei rejistu fila-fali hodi bele hetan apoiu ne’e, maibé ba sira-ne’ebé tuan ne’e nafatin mai prenxe formuláriu maibé labele haluha lori folla pagamentu nune’e INSS bele rejistu.

“Traballadór sira-ne’ebé servisu iha empreza ne’e, ita sei la fasilita ho individual maibé empreza mak tenke mai rejistu. Maibé ba motorista, taksista, negosiante, kioske sira inklui sira-ne’ebé halo negosiu ho motór bele mai prenxe formuláriu, maibé tenke lori kartaun eleitorál no konta bankária, nune’e ami bele ajuda prénxe hotu,” nia dehan.

Ba hirak ne’ebé konta bankária laiha, nia hateten, tenke prénxe deklarasaun hosi ema ruma ne’ebé fó ninia konta bankária ba sira ho deklarasaun euma depois mak Governu transfere osan ba konta bankária ne’e mak tenke entrega ba ema ne’e, maibé labele nonook ho konta bakaria ne’e.

Notísia Relevante: Apoiu empregu, MSSI husu traballadór sira rejistu liuhosi karta eletrónika

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here