Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos. Imajen Tatoli/Egas Cristovão

DILI, 11 maiu 2021 (TATOLI)—Governu liuhosi Ministériu Solidaridade Sosiál no Inkluzaun (MSSI) liu-liu hosi Institutu Nasionál Seguransa Sosiál (INSS) husu ba traballadór sira iha territóriu nasionál atu bele trejistu no hato’o pedidu liuhosi karta eletrónika, tanba Governu sei fó apoiu liuhosi programa “Apoiu ba empregu”. 

Notísia Relevante: COVID-19, Governu kria medida neen fó apoiu ba empregu sira

“MSSI liuhosi Gabinete Ministra da Solidarieda husu ba traballadór sira atu hato’o rejistu naran ka pedidu liuhosi karta eletrónika hodi bele hetan apoiu ba empregu. Pedidu ne’e bele manda ba karta eletrónika; seguransasocialtl@gmail. com no MSSI site: mss.gov.tl,” Vise-Primeiru Ministru no Ministra Solidariedade Sosiál no Inkluzaun (MSSI), Armanda Berta dos Santos, apela liuhosi komunikadu imprensa ne’ebé Agência TATOLI asesu, tersa ne’e.

Implementasaun ba programa ida-ne’e hala’o hosi Institutu Nasionál Seguransa Sosiál (INSS) maibé traballadór sira-nia bele hato’o iha servisu solidariedade sosiál iha munisípiu sira no inklui Rejiaun Administrativa Espesiál Oé-cusse Ambeno (RAEOA) hahú iha loron tersa (11 maiu 2021).

“Iha ona medida kona-ba Apoiu Empregu ne’ebé Governu hamosu hodi tulun traballadór sira-ne’ebé afetadu hosi pandemia COVID-19,” Armanda Berta dos Santos hateten.

Tanba, tuir nia, ho pandemia COVID-19 ne’e, traballadór sira labele hala’o sira-nia atividade normál no impede nafatin hala’o kna’ar tanba forsa legál hahú kedas iha fulan marsu.

Nia parte komunika mós ba empreza sira hotu ne’ebé rejista ona iha seguransa sosiál no emprezaria individual (ENIN), traballadór konta rasik, traballador servisu domestiku, ba sira-ne’ebé lakon servisu (dezempregu) no inskreve ona iha seguransa sosiál no mós sira-ne’ebé hakarak inskreve hafoin diploma ne’e iha.

Entretantu, Prezidente Konsellu Administrasaun Institutu Nasionál Seguransa Sosiál (INSS), Longinhos Amando Leite hatutan, traballadór sir abele rejistu liuhosi karta eletrómoka no mós sira bele ba direta eskritóriu INSS nian no MSSI munisípiu sira, maibé tenke kumpre regra Ministériu Saúde (MS) no Organizasaun Mundiál Saúde (OMS) ne’ebé aplika ona katak uza máskara, fase liman, distansiamentu sosiál no fíziku.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here