DILI, 21 maiu 2021 (TATOLI) – Universidade Dili (UNDIL) ho Universidade da Paz (UNPAZ) prontu simu estudante benefisiáriu bolsa hakbiit na’in-80 atu estuda iha fakuldade Siénsia Saúde, Enjeñaria no Fakuldade Agríkola.
Notísia Relevante : FDCH ho IESPP-sira asina MoU apoia bolsa hakbiit ba benefisiáriu 910
Magnífiku Reitór UNDIL, José Agostinho da Costa Belo, hateten estudante na’in-40 nu’udar benefisiáriu hosi Bolsu Hakbiit atu integra iha UNDIL sei koloka iha Fakuldade Siénsia Saúde.
Programa Bolsa Hakbiit ne’e kria hosi Ministériu Ensinu Superiór, Siénsia no Kultura (MESSK) atu ajuda bolsu estudu ba Timor-oan sira ne’ebé laiha kbiit finanseira atu kontinua sira-nia estudu iha ensinu superiór.
“Mézmu prosesu ensinu akadémiku iha UNDIL hala’o tiha ona ho aula distánsia, maibé ami prepara ona atu trata sira ninia prezensa atu hetan mós matéria. Tan ne’e, ami hein hela sira na’in 40 ninia prezensa iha UNDIL,” José Belo informa ba Agência Tatoli iha UNDIL, sesta ne’e
Magnífiku Reitór UNPAZ, Adolmando Amaral informa sira mós hetan vaga 40 ba estudante foun benefisiáriu Bolsa Hakbiit nian, ne’ebé UNPAZ sei koloka sira iha fakuldade enjeñaria na’in-20 no na’in-20 seluk iha fakuldade Agríkola 20. Maibé bainhira mak estudante sira atu marka prezensa, politikamente desizaun Ministériu nian liuhosi Fundus Dezenvolvimentu Kapitál Humano (FDCH).
Notísia Relevante : IESP tolu preparadu simu estudante Bolsa Hakbiit
Jornalista : Tomé Amado
Editór : Francisco Simões
