Ministru Ensinu Superiór, Siénsia no Kultura (MESSK), Longuinhos dos Santos, sai sasin ba asina memorandu entendimentu entre FDCH ho IESPP-sira kona-ba poiu bolsa hakbiit, segunda(17/05/2021). Imajen Tatoli/Egas Cristóvão.

DILI, 17 maiu 2021 (TATOLI) – Diretora Ezekutivu Fundus Dezenvolvimentu Kapitál Umanu (FDCH, sigla portugés), segunda ne’e, asina memorandu entendimentu ka MoU (Memorandum of Understanding)  ho Instituisaun Ensinu Superiór Públiku no Privadu (IESPP) hamutuk 15 hodi fasilita benefisiáriu na’in-910 asesu ba bolsu hakbiit.

Notísia Relevante : Meta MESSK to’o 2023, fó bolsa estudu ba kbiit-laek 3.000

MoU ne’ebé estabelese entre parte rua-ne’e foka ba área prioridade lima bazeia ba planu rekuperasaun ekonómiku mak hanesan Agrikultura, Edukasaun, Enjeñaria, Saúde no Turizmu.

Ministru Ensinu Superiór Siénsia no Kultura (MESSK), Longuinhos dos Santos, sai mós hanesan sasin ba serimónia asina MoU entre FDCH ho IESPP-sira ne’ebé hala’o iha Salaun Ian Martin, INFORDEPE, Dili.

Diretora Ezekutivu FDCH, Leila Cárceres dos Santos, esplika, totál vaga 910 benefisiáriu  atu asesu bolsa hakbiit ba IESPP ne’e ho kategoria ba Instituisaun Ensinu Superiór Públiku rua hanesan Universidade Nasionál Timor Lorosa’e (UNTL) no Institutu Politéknika Betano (IPB) hamutuk vaga 500. Klasifikasaun vaga ba UNTL 480 no IPB vaga 20. Nune’e bá Instituisaun Ensinu Superiór Privadu 13 sei hetan atribuisaun vaga hamutuk 410.

“Ba Instituisaun Ensinu Superiór Privadu 13 ne’e, ami prevee vaga 410. Ami sei atribui  ba Instituisaun Ensinu Superiór Privadu 13 ho klasifikasaun hanesan  DIT vaga 50, IOB (50), Institutu Superiór Cristal (ISC) (50), UNDIL (40), UNPAZ (40), UNITAL (35), Institutu Katólika ba Formasaun Profesór-sira  (ECFP) (30), Institutu São João de Brito (ISJB) (30), East Timor Coffee Institute (ETCI) (20), Institutu Profisionál  Canossa (IPDC) (20), Institutu Siénsia de Saúde Dili (ISC) (20), João Saldanha University (JSU) (15) ho Institutu Boaventura Timor-Leste (IBTL) vaga lima (5),” informa Leila Cárceres, ba jornalista-sira hafoin serimónia ne’e.

Notísia Relevante : MESSK fó kompeténsia FDCH regula prosesu implementasaun bolsa estudu kbiit-laek

Leila hateten, loloos dadus-sira ne’e finaliza tiha ona iha marsu 2021, tanba serka sanitária no konfinamentu obrigatóriu, difikulta ekipa nasionál atu dezloka ba munisípiu hodi hala’o servisu inskrisaun.

“Ami nia alvu fulan ida-ne’e tenke remata hodi bele tama ona ba prosesu selesaun depois mak fó sai avizu, atu nune’e, bele fó biban ba FDCH bele selebra kontratu ho bolseiru-sira iha de’it nivel Universidade ka Instituisaun Ensinu Superiór-sira,” Leila hateten.

Notísia Relevante : FDCH prevee millaun $1.5 ba programa bolsa hakbiit

Iha fatin hanesan  Magnífiku Reitór Universidade da Paz (UNPAZ), Adolmando Amaral, orgullu tanba tinan barak sira hein hela polítika Governu nian atu apoiu bolsa estudu ba Institutu Ensinu Superiór Privadu sira, maibé ohin mehi ne’e sai ona realidade.

“Baibain bolsa estudu ne’e oferese de’it bá UNTL no IPB, maibé ohin ami iha Instituisaun Ensinu Superiór Privadu mós bele hetan ona bolsa estudu. Ita agradese bá polítika VIII Governu nian fó ona espasu ba Timoroan atu sai benefisiáriu bolsa estudu ne’ebé selu ho osan Estadu nian,” nia tenik.

Magnífiku Reitór UNTL, João Soares Martins mós agradese ba Governu ne’ebé valoriza ona IESPP sira no orgullu ba inisiativa Ministru Longuinhos dos Santos nian hodi trata direitu timoroan sira nian atu asesu ba edukasaun iha ensinu superiór.

Ministru Ensinu Superiór Siénsia no Kultura (MESSK), Longuinhos dos Santos, hateten nia hatene didi’ak juventude jerasaun foun sira nian kapasidade, barak mak laiha oportunidade tanba ekonomia família la garante.

Hanesan governante, nia hahú loke oportunidade ba dahuluk ba benefisiáriu 910 hodi asesu ba bolsa hakbiit kuandu ba futuru maka hetan progresu, fiar katak programa ida ne’e sei bele kontinua ba oin no sei hetan benefisiáriu barak liután.

Mekanizmu selesaun vaga 410 ba Institutu Ensinu Superiór Privadu bazeia ba kooperasaun no servisu hamutuk entre FDCH ho Ministériu Edukasaun Juventude no Desportu inklui Ministériu Solidariedade Sosiál Inkluzaun (MSSI) ho autoridade lokál iha munisípiu atu nune’e bele hetan dadus loos no justu ba estudante- sira ne’ebé mai duni hosi família kbiit-laek.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here