Ministru Ensinu Superiór, Siénsia no Kultura, Longuinhos dos Santos, partisipa iha serimónia asinatura Memorandu Entendimentu entre Fundu Dezenvolvimentu Kapital Umanu (FCDH, sigla portugés) ho Instituisaun Ensinu Superiór Publiku no Privadu sira ba implementasaun Bolsa Hakbi’it, segunda (17/05/2021). Imajen/Mídia MESSK

DILI, 18 maiu 2021 (TATOLI) – Instituisaun Ensinu Superiór Privadu (IESP) tolu, kompostu hosi Institutu Siénsia   Kristál (ISC), Institute of Business (IOB) no Universidade Orientál (UNITAL) preparadu ona  simu estudante benefisiáriu Bolsa Hakbiit hamutuk 135 iha tempu besik.

Notísia Relevante : FDCH ho IESPP-sira asina MoU apoia bolsa hakbiit ba benefisiáriu 910

Estudante sira-ne’e sei koloka iha Fakuldade Information Communication and Technology, Fakuldade Ekonomia, Fakuldade Siénsia Saúde, Fakuldade Enjeñaria no Fakuldade Siénsia Edukasaun.

Magnífiku Reitór ISC, Sebastião Pereira, afirma katak ninia instituisaun sei simu estudante benefisiáriu Bolsa Haki’it hamutuk 50, estudante sira-ne’e sei koloka na’in-20 iha Fakuldade Siénsia Saúde no na’in-30 iha Fakuldade Siénsia Edukasaun.

“Ami nia fakuldade rua ne’e preparadu ona atu simu estudante sira-ne’e. Orasida kuandu sira integra ona mak iha konkordánsia entre fakuldade ho estudante sira hakarak koloka loloos iha departamentu ne’ebé,” Sebastião Pereira, hateten ba Agência Tatoli iha ISC, Balide, Dili, tersa ne’e.

Nia dehan, durante ne’e sira iha mehi atu apoiu estudante hosi família kbiit-laek sira atu hetan fatin iha ISC. Maibé, dala-barak estudante-sira remata ensinu sekundáriu hakarak tama liubá Instituisaun Ensinu Superior Públiku.

Nia dehan, ho  polítika VIII Governu nian loke ona espasu ba estudante kbiit-laek sira atu asesu iha IESP-sira no oportunidade ne’e hanesan orgullu boot atu fasilita Timor-oan hotu bele asesu ba eskola ensinu superiór privadu-sira.

Vise-Reitór IOB trata asuntu Akademia Estudantíl, Antonio Soares Martins, afirma katak IOB mós preparadu atu simu estudante benefisiáriu Bolsa Haki’it hamutuk 50.

Estudante sira ne’e no sei koloka na’in-15 iha Fakuldade Information Communication and Technology (ICT) no  na’in-20 iha Fakuldade Ekonomia.

Magnífiku Reitór UNITAL, Florindo Pereira, mós akresenta katak UNITL  hetan de’it vaga 35 ba estudante Bolsa Hakbiit no sira sei integra estudante sira-ne’e iha Fakuldade Siénsia Saúde ho Fakuldade Enjeñaria.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here