Reprezentante PUDD, Prezidente Komisáriu Polítika Nasionál (KPN), Silvestre Xavier Sufa, ho estrutura toma hala’o konferénsia imprensa Relasiona ho aniversáriu PUDD nian ba dala-neen (6), iha sede PUDD, Aitarak-laran, Dili. Imajen Tatoli/Osória Marques.

DILI, 17 maiu 2021 (TATOLI)—Partidu Unidade Dezenvolvimentu Demokrátiku (PUDD), segunda ne’e PUDD selebra aniversáriu ba dala-neen iha jornada politíku nian no apela ba estrutura tomak iha territóriu nasionál atu hametin prinsípiu PUDD nian, hodi prepara-aan ba eleisaun prezidensiál tinan oin. 

“Ho selebrasaun aniversáriu dala-neen (6) ba tinan ida-ne’e, hakarak apela ba estrutura hosi nasionál to’o baze hotu atu nafatin konsolida ita-nia forsa politíku hotu hodi prepara-aan ba eleisaun ne’ebé sei tuir mai. Tenke hamriik metin nafatin iha prinsípiu PUDD nian atu manan konfiansa tomak, nune’e haboot no habelar liután PUDD nia ezisténsia polítika iha Nasaun RDTL,” Prezidente Komisáriu Polítika Nasionál (KPN), Silvestre Xavier Sufa, hateten ba jornalista sira liuhosi konferénsia imprensa iha sede PUDD, Aitarak-laran, Dili, segunda ne’e.

Prezidente KPN PUDD ne’e apela ba estrutura tomak tanba loron 17 maiu 2015 mak  partidu ne’e hahú ninia jornada politiku, no durante tinan neen (6) ne’e konsege kompete ona eleisaun jerál dala rua iha tinan 2017 no 2018.

Hosi eleisaun daruak nian ne’e, PUDD konsege hetan asentu iha Parlamentu Nasionál no hosi tinan 2018 to’o agora PUDD hala’o ona nia funsaun iha Parlamentu Nasionál hodi kontrola Governu no kontribui ba dezenvolvimentu nasionál no politíku lejislasaun sira.

“Atinjimentu PUDD nia jornada ne’e tanba esforsu tomak ne’ebé estrutura hosi nasionál, rejionál, munisípiu, postu, suku no aldeia sira hotu nia forsa tomak ne’ebé mak hametin ita-nia unidade hodi ita hamutuk ida de’it sai forte no susesu,” nia dehan.

Iha biban ne’e, portavós ne’e hato’o agradesimentu boot ba estrutura, militante, simpatizante tomak ne’ebé durante ne’e servisu makaas hodi atinje objetivu no mós parte hotu nafatin servisu makaas hodi prepara-aan ba eleisaun tuir mai.

Ho nune’e, ni dehan, atu nune’e bele hamutuk hodi harii dezenvolvimentu ne’ebé mak demokrátiku tuir konstituisaun RDTL atu povu bele moris di’ak no prósperu, no dezenvovimento ida-ne’ebé ekilibriu ba ema hotu no ba fatin hotu ne’ebé iha balansu.

“Parabéns ba aniversáriu PUDD nia ezisténsia atu mellora liután dezenvolvimentu ne’ebé sustentável no ekilibriu,” nia dehan.

Partidu Unidade Dezenvolvimentu Demokrátiku (PUDD), rejistu iha Tribunál Rekursu iha fulan-agostu 2015, no serimónia harii partidu hala’o iha fulan-agostu 2016. Prezidente dahuluk ba PUDD mak Julio da Silva Salsinha no Vise-Prezidente mak Silvester Sufa.

Iha eleisaun parlamentár 2017, PUDD halibur votu 2,80% no la konsege hakat liu bareira 4%. Hafoin ne’e PUDD hamutuk ho Forum Demokrátiku Nasionál (FDN) maibé husik hela aliansa ne’e, PUDD sai membru Frente Dezenvolvimentu Demokrátiku (FDD) iha 11 dezembru 2017. António de Sá benevides ne’ebé agora daudaun sai Prezidente PUDD ne’e mak eleitu sai Prezidente FDD.

Notísia Relevante: PDN Ejize Direitu Ba UDT, FM no PUDD

Ho ezisténsia FDD ne’e, PUDD bele hetan asentu no tama iha Parlamentu Nasionál iha inísiu eleisaun 2018 nian ho porsaun 5,5% (ho votu 34.301) no António de Sá Benevides eleitu sai membru Parlamentu Nasionál, no FDD fahe malu hafoin hili reprezentante FDD tuur iha parlamentu.

Iha 22 fevereiru 2020, CNRT, KHUNTO, PD, UDT, FM no PUDD asina akordu koaligasaun atu forma Governu foun maibé Prezidente Repúblika Francisco Guterres Lú Olo la responde pedidu Alainsa atu indika Xanana Gusmão sai Primeiru-Ministru, no abril 2020 nia rohan KHUNTO sai hosi aliansa ne’e.

Notísia Relevante: PUDD Hamutuk ho CNRT Hodi Hakotu Impase Polítika

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here