Imajen TATOLI/Evaresto Marrtins Soares

DILI, 13 marsu 2020 (TATOLI)—Partidu Dezenvolvimentu Nasionál (PDN) husu ba Partidu União Demokrátika Timorensse (UDT), Frenti-Mudança (FM), no Partidu Unidade Dezenvolvimentu Demokátiku (PUDD) atu kumpri akordu balu molok halo disolusaun ba Frente Dezenvolvimentu Demokrátiku (FDD) iha 2018.

Prezidente PDN, Fernando Gusmão afirma, se partidu tolu ne’e hakarak hamutuk ho koligasaun foun hodi fó solusaun ba impase polítiku ne’e tenke ko’alia ho PDN kona-ba direitu balu. Prezidente PDN ne’e mós rekoñese FDD disolve ona maibé direitu balu PDN seidauk hetan.

“Ami ezjije ami-nia direitu tanba akordu mak ne’e, PDN nia naran sei ba parlamentu katak PUDD/PDN. Segundu, PDN iha direitu atu hatudu nia ema sai asesór iha bankada parlamentár nian ne’ebé hosi partidu tolu ne’e, PDN hetan prioridade kuandu hetan konvite ba Governu, ikus liu mak subvensaun públiku katak direitu votu sira-ne’ebé iha tiha ona ne’e oinsá. Tolu, agora buat sira-ne’e hotu seidauk realiza, tanba ne’e ami husu kumpri promesa sira-ne’ebe iha molok ita halo disolusaun ba koligasaun Frente Dezenvolvimentu Demokrátiku,” dehan Prezidente PDN, Fernando Gusmão, liuhosi konferénsia imprensa iha Hotel Arbiru Beach, Bebonuk, sesta ne’e.

Prezidente PDN akresenta, iha 2017 partidu tolu nia votu bele barak uitoan maibé 2018 sei la’o mesak mós hotu-hotu sei la hakat liu barreira tanba tau hamutuk votu mak hodi hetan asentu parlamentár ne’e.

Prezidente PDN ne’e fó ultimatu ba UDT, FM no PUDD atu iha semana ida-ne’e tuur hamutuk buka solusaun hodi rezolve promesa ne’e.

“Se ami-nia maluk tolu ne’e la bolu PDN iha tempu badak hodi fó solusaun, ami prosesa fali keixa sira antesa ami hatama ona.

Preizdente PDN husu partidu tolu ne’e mós tenke rekoñese serbisu PDN nian to’o partidu tolu ne’e hetan asentu parlamentár.

Prezidente PDN ne’e fó-sai, FDD nu’udar koligasaun partidu polítiku konkore iha eleisaun antesipada iha loron 12 fulan-maiu 2018 ho lista únika (lista FDD), tanba ne’e mak koligasaun FDD hetan votu hamutuk 34.301.

Nia dehan, hosi rezultadu votu ne’e mak halo partidu UDT,  FM no PUDD bele hetan kadeira tolu iha Parlamentu Nasionál, ne’e mós parte hosi kontribuisaun PDN nian.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here