DILI, 08 marsu 2020 (TATOLI)—Partidu Unidade Dezenvolvimentu Demokrátiku (PUDD) deside hamutuk ho Partidu Congresso Nacional de Reconstrução de Timor (CNRT) no partidu haat seluk hodi hakotu impase polítiku iha rai-laran.

PUDD deside hamutuk ho CNRT, KHUNTO, PD, UDT no Frenti-Mudança liuhosi rezolusaun númeru: 001/PUDD/KNE/III/2020 ho maioria absoluta hosi konfrensista sira.

“Konfrensista sira hotu deside ho aklamasaun hodi reafirma pozisaun PUDD nian ba halo koligasaun ho Partidu CNRT, KHUNTO, PD, UDT no FM ne’ebé lidera hosi Kay Rala Xanana Gusmão hodi fó solusaun ba impase polítika ida-ne’e atu garante soberania Estadu RDTL, estabilidade nasionál, polítika eksterna no dezenvolvimentu ekonomia nasionál atu hasai povu hosi mukit,” Prezidente Órgaun Profisionál PUDD, Alberto Carvalho Araújo, informa liuhosi konferénsia imprensa hafoin realiza konferénsia estraordinária ho konfresista na’in-85, iha Hotel Vila Verde, Dili, domingu ne’e.

PUDD selebra konferénsia estraordinária ne’ebe partisipa husi estrutura nasionál, munisipál no Komisariu Polítika Nasionál hodi haktuir Lei Partidu Polítiku Nú. 2/2016, artigu 9, 1 de 17 de janeiro atu hatãn ba rekezitu ne’ebé Prezidente Repúblika propoin iha soru-mutuk ho koligasaun foun ne’ebé lideradu hosi Prezidente Partidu CNRT, Kay Rala Xanana Gusmão iha loron 6 fulan marsu tinan 2020.

Prezidente Órgaun Profisionál PUDD, Alberto Carvalho Araújo afirma, partidu refere hamutuk ho koligasaun atu solusiona impase politika ne’ebé nasaun RDTL enfrenta durante tinan tolu (3) nia laran.

Tanba ne’e, nia dehan, presiza duni iha koligasaun foun entre partidu polítiku sira ne’ebé iha asentu Parlamentár hodi hetan Aliansa Maioria Parlamentár iha Parlamentu Nasionál (PN) nune’e hodi forma IX Governu Konstitusionál.

Konferénsia estraordinária ne’e hodi hatán ba Xefe Estadu nia ezijénsia ne’ebé asina hosi Prezidente PUDD, António de Sá Benevides, Sekretáriu Jerál, José Monteiro “Fera Loelaku”, Prezidente CPN, Silvestre Sufa, Prezidente Konsellu Nnasionál Formasaun Profisionál PUDD, Júlio Salsinha no Prezidente Konselleiru, Adjuntu Matos Lao-Rai.

Notísia Relevante: Bankada PUDD Husu PR Kontinua Halo Diálogu Ho Entidade Hotu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here