Traballadór sira hatun foos iha Portu Dili. Imajen Tatoli/António Gonçalves

DILI, 17 maiu 2021 (TATOLI)—Governu liuhosi Ministériu Solidariedade Sosiál no Inkluzaun (MSSI) distribui ona foos saka 28.000 ba família vulnerável iha territóriu nasionál (Timor-Leste).

Notísia Relevante: Governu Austrália entrega apoiu umanitáriu ba MSSI

“Dezde Governu hahú implementa serka sanitária to’o agora, ita fó apoiu foos ba família vulnerável iha territóriu nasionál hamutuk saka 28.000,” Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten ba Agência TATOLI, liuhosi telefónika, segunda ne’e.

Governu liuhosi MSSI kontinua fó apoiu foos ba família vulnerável sira, maibé presiza autoridade lokál nia aproximasaun hodi identifika ema-ne’ebé presiza duni tulun hosi Governu.

Durante ne’e, MSSI fó apoiu nafatin ba família vulnerável sira bazea ba pedidu maibé pro-ativu ne’e autoridade lokál sira, tanba sira mak hatene liu sira-nia komunidade iha aldeia, suku inklui sira-ne’ebé hela iha kost (aluga uma).

Ba abitante sira-ne’ebé hela iha kost, Diretór ne’e hateten, MSSI labele ba direta hodi foti dadus iha terrenu maibé autoridade lokál sira mak tenke identifika nia komunidade ne’ebé presiza duni apoiu hahan hosi Governu mak hafoin MSSI bele distribui foos ba sira.

“Kona-ba ida-ne’e, ami koordena no halo enkontru ho Ministériu Administrasaun Estatál (MAE) atu oinsá bele fó atendementu ba populasaun sira iha situasaun serka sanitária nia-laran. Família no grupu vulnerável barak mak presiza tulun maibé ita presiza dadus nune’e bele distribui tuir. Ami fó apoiu hela. La’ós la fó maibé presiza identifika lai,” nia hatutan.

Oinsá intervensaun Governu ba akontesimentu inan ida peñor nia oan ba kost-na’in. nia dehan, MSSI sei husu ba autoridade lokál atu identifika lalais no hafoin MSSI hetan dadus mak bele rezolve kestaun ne’e.

MSSI nafatin fó tulun ba populasaun iha Dili inklui munisípiu sira seluk ne’ebé sai alvu ba MSSI nia apoiu, tanba dadus hirak ne’e MSSI hetan bainhira iha koordenasaun ho autoridade lokál sira.

Bazea ba ida-ne’e, nia dehan, MSSI kontinua asegura estoke foos iha armajén kada munisípiu sira tanba ho nia objetivu atu asegura no bele fó apoiu ba grupu vulnerável sira ne’ebé presiza tulun.

“Ami garante estoke foos iha kada armajén munisípiu sira, tanba ne’e MSSI nia parte kontinua asegura hodi distribui de’it bainhira ita identifika ona ema-ne’ebé sai prioridade liu,” nia dehan.

Notísia Relevante: UE ho Plan internasionál entrega apoiu umanitária liuhosi MSSI

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here