EU ho Plan Internasionál simbolikamente entrega apoiu umanitária ba vítima dezastre natural no afetadu pandemia COVID-19 liuhosi MSSI. Imajen/Plan Internasionál

DILI, 09 abríl 2021 (TATOLI) – Embaixadór Uniaun Europeia (UE) mai Timor-Leste, Andrew Jacobs ho Country Director Plan Internasionál Timor-Leste, Dillyana Ximenes, sesta ne’e, entrega apoiu umanitária hanesan ai-han no materiál ijiene ba Ministériu Solidariedade Sosiál no Inkluzaun (MSSI) hodi suporta família afetadu  dezastre naturál no família afetadu pandemia COVID-19.

Notísia Relevante : Komunidade agradese apoiu umanitária hosi povu EUA

Komunikadu imprensa ne’ebé Angência Tatoli asesu hosi Plan Internasionál mai Timor-Leste, relata katak apoiu  ida-ne’e sei benefisia uma-kain 5,755 konsentra liu ba feto, labarik feto, grupu vulneravel no 500 ema ho defisiénsia.

Durante periodu konfinamentu tanba COVID-19, família barak mak hasoru difikuldade barak. Difikuldade hirak-ne’e,  inklui redusaun ba sira-nia rendimentu no menus nesesidade báziku, espesialmente hahán.

Uniaun Europeia ho Plan Internasionál Timor-Leste nota katak situasaun ida-ne’e piór liu tan ho inundasaun: família rihun ba rihun devastadu tanba udan-boot iha loron 4  abríl 2021 iha Timor-Leste laran tomak.

Ema rihun ba rihun dezlokadu, uma no infrastrutura hetan estragus no mout. Dezastre ne’e mós hamate ema barak no balun mós sei lakon. Feto, labarik, grupu vulneravel no ema ho defisiénsia partikularmente risku durante emerjénsia. Autoridade sira, doadór, organizasaun naun governmental no komunidade servisu hamutuk hodi ajuda família, liuliu ba sira ne’ebé iha sentru evakuasaun.

Embaixadór Andrew Jacobs hato’o nia sentidu kondolénsia no solidariedade ba família ne’ebé afetada hosi pandemia COVID-19 no vítima ba inundasaun. Nia hato’o katak Uniaun Europeia hamriik ho povu Timor-Leste durante tempu susar ida ne’e.

“Ami kontente ho suporta ne’ebé iha, iha forma ai-han no materiál ijiene, ba sira ne’ebé afetadu hosi dezastre foin lalais ne’e, ne’ebé aumenta liután difikuldade kauza husi COVID-19,” hateten Andrew Jacobs.

Country Director of Plan International Timor-Leste,  Dillyana Ximenes, énfaze feto, labarik liuliu labarik feto mak vulneravel liu durante emerjénsia nia laran. Tanba ne’e Plan Internasionál servisu hamutuk ho Governu no parseiru sira hodi garante katak intervensaun durante emerjénsia ne’e inkluzivu.

“Plan Internasionál Timor-Leste kontinua servisu ho ami nia parseiru sira, Uniaun Europeia, Governu no mós sobrevivente hodi fornese nesesidade kurtu no longu prazu hodi fó responde imediatu liuliu ba labarik, joven no ema ho defisiénsia,” Dillyana Ximenes hateten.

Jornalista     : Eugénio Pereira

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here