DILI, 16 dezembru 2020 (TATOLI)–Governu liuhosi Ministériu Ensinu Superiór, Siénsia no Kultura (MESSK), iha tinan 2021 to’o 2023 iha ona meta atu fó bolsa estudu ba kbiit-laek hamutuk 3.000.
“Iha 2020, Ministériu Ensinu Superiór, Siénsia no Kultura fó bolsa estudu ba kbiit-laek hamutuk 910, maibé meta ba 2023 Governu hakarak atinje to’o 3.000, entaun kada tinan ita fó ba na’in-1.000,” Ministru Ensinu Superiór, Siénsia no Kultura, Longuinhos do Santos, informa iha Palásiu Governu, kuarta ne’e.
Ministru dehan, Governu liuhosi MESSK iha tinan oin sei prioritiza programa bolsa ba kbiit-laek timor-oan sira.
Iha 2021, Governu sei oferese bolsa estudu ba ema kbiit-laek hamutuk 910 ne’ebé sei koloka ba universidade públiku hanesan Universidade Nacional Timor Lorosa’e (UNTL) no Institutu Politékniku Betano (IPB) hamutuk 500 inklui ba universidade privadu sira iha rai-laran hamutuk 410.
Orsamentu ba tinan fiskál 2021 ne’ebé aloka ba Fundu Dezenvolvimentu Kapitál Umanu (FDCH, sigla portugés) foku ba programa haat hanesan programa formasaun profisionál, programa treinamentu tékniku, programa bolsa estudu no programa seluk ho tipu formasaun.
Notísia Relevante: 2021, FDCH prioritiza bolsa estudu ba Timor-oan
Enkuantu, bolsa ba rai-li’ur seidauk bele realiza tanba situasaun pandemia globál, tanba ne’e ministériu deside implementa ano zero (kursu prepasaun estudu) atu benefisiáriu sira estuda língua, disiplina jerál sira, no kultura iha ema-nia país.
“Ida-ne’e mak ita estabelese ano zero no hein mudansa situasaun COVID-19 maka ita foin desloka benefisiáriu bolsa estudu sira ba rai-li’ur,” governante ne’e hatutan.
Alokasaun orsamentu ba FDCH fó prioridade ba bolsa estudu nu’udar kontinuidade hosi liña ministeriál no bolseiru foun ne’ebé mai hosi MESSK ba kbiit-laek nia oan sira hanaran ‘bolsa hakbiit’ no bolsa estudu ba dosente iha universidade privadu no públiku sira.
Ba kapitál sosiál no reforsa institusionál, orsamentu alokadu boot liubá bolsa estudu ho montante $7.764.215, ne’ebé ekivalente ho 59,7% hosi totál orsamentu FDCH.
Programa bolsa estudu ho intensaun atu aumenta koñesimentu no abilidade akadémika hodi bele kontribui ba dezenvolvimentu ekonomia.
Jornalista : Florêncio Miranda Ximenes
Editora: Julia Chatarina
Boa noite bolsa studo sei loke g?