Ministru Ensinu Superiór, Siénsia no Kultura, Longuinhos dos Santos, akompaña hosi Diretora Ezekutiva FDCH, Leila Cárceres dos Santos, no entidade relevante, asina diploma ministeriál. Imajen/Mídia MESSK

DILI, 02 marsu 2021 (TATOLI)—Ministru Ensinu Superiór, Siénsia no Kultura (MESSK), Longuinhos dos Santos, halo ona lansamentu programa bolsa estudu ba kbiit laek ho asinatura diploma ministeriál, atu fó kompeténsia ba Sekretariadu Tékniku Fundu Kapitál Umanu (FDCH, sigla portugés) ho koordenasaun entidade relevante seluk, hodi bele regula prosesu implementasaun programa.

Lansamentu ne’ebé hala’o iha loron 25 fevereiru ne’e, akompaña mós hosi Diretora Ezekutivu FDCH, Leila Cárceres dos Santos, no entidade relevante.

“Iha tinan 2020, Ministériu Ensinu Superiór, Siénsia no Kultura fó bolsa estudu ba kbiit-laek hamutuk 910, maibé metas ba tinan 2023 Governu hakarak atinje to’o 3.000, entaun kada tinan ita fó ba na’in-1.000,” refere nota ne’ebé Agência TATOLI asesu, tersa ne’e.

Programa bolsa estudu oferese ba estudante sira-ne’ebé mai hosi família vulnerálvel ka karensiada, ho objetivu prinsipál atu garante sidadaun timor-oan hotu asesu ekuitativu ba ensinu superiór no hamenus kiak, ne’ebé sai hanesan meta prinsipál Programa VIII Governu Konstitusionál.

Orsamentu tinan fiskál 2021 ba FDCH ho montante $12.995.000, fó prioridade ba kapitál sosiál liuliu bolsa estudu timor-oan.

Hosi totál ne’e aloka  ba bens no servisu atu prioritiza programa haat hanesan programa formasaun profisionál $1.077.800, programa treinamentu tékniku $3.146.452, programa bolsa estudu  $7.764.215 no programa seluk ho tipu formasaun $1.006.533.

Enkuantu, iha orsamentu 2021, FDCH fó prioridade ba bolsa estudu kontinuidade hosi liña ministeriál no bolseiru foun hosi MESSK ba kbiit-la’ek nia oan sira hanaran ‘bolsa hakbiit’ no bolsa estudu ba dosente privadu no públiku sira.

Maski ho situasaun surtu COVID-19 labele haruka ba rai-li’ur, maibé FDCH halo ona planu ano zero iha rai laran. 

Ba kapitál sosiál no reforsa insititusionál, orsamentu alokadu boot liu  ba bolsa estudu ho montante $7.764.215, ne’ebé ekivalente ho 59,7% hosi totál orsamentu FDCH nian.

Programa bolsa estudu atu aumenta koñesimentu no abilidade akadémika hodi bele kontribui  ba dezenvolvimentu ekonomia.

To’o tinan ne’e,  benefisáriu bolsa estudu hamutuk 1.154 no meta iha 2021 atu forma tan bolseiru 2.345, kompostu hosi feto 1.115 no mane 1.230. 

Tinan 2021, FDCH iha sub-programa 21

Iha tinan 2021, FDCH iha sub-programa 21 no totál atividade 59, ne’ebé númeru benefisiáriu hamutuk 19.873,  kompostu husi feto 9.913 no mane  9.760.

Ba formasaun profisionál atu hasa’e abilidade juventude sira hodi bele responde ba nesesidade indústria no merkadu traballu iha Timor-Leste, jere hosi Sekretariu Estadu Profisionál no Empregu (SEFOPE) iha área formasaun lian Korea no Inglés iha Dili no Rejiaun Administrasaun Espesiál Oé-cusse no Ambeno (RAEOA).

Tuir relatóriu 2019, iha área formasaun profisionál kosenge forma ona joven hamutuk 5.044 no meta atu forma tan benefisáriu hamutuk 2.872, kompostu hosi feto hamutuk 672 no mane 2.186.

Nune’e mós, kontinua formasaun tékniku atu dezenvolve kapasidade funsionáriu públiku hodi bele mellora di’ak liután prestasuan servisu iha ajente administarsaun públiku, formasaun ba área judisiáriu no formasaun ba profesór sira iha lian portugés. 

Funsionáriu ne’ebé sai benefisáriu formasaun téknika hamutuk 4.482 ho meta atu fó formasaun tan 16, 890, kompostu husi feto 8.364 no mane 8.526.

Hahú tinan 2011 to’o outubru 2020, FDCH liuhosi programa formasaun profisionál, forma ona joven 32.678, ba programa formasaun tékniku ne’ebé benefisiáriu hosi funsionáriu públiku hamutuk 32.688,  ba programa bolsa estudu 5.266 no programa formasaun tipu seluk hamutuk 11.295.

Programa governu ne’e haree ba estudante sira ne’ebé sei ativu to’o agora hamutuk 1.151 no sira ne’ebé gradua ona pur volta 3.848 inklui kanseladu ho razaun mate 267. 

Partisipa iha serimónia ne’e Diretora-Jerál Ensinu Superiór no Siénsia, Koordenadora Unidade Koordenasaun Apoiu ba Estudante (UKAE), tékniku no asesór sira.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here