Edifísiu Komisaun Nasionál Eleisaun (CNE-sigla portugés). Imajen/Espesiál.

DILI, 14 maiu 2021 (TATOLI)—Komisaun Nasionál Eleisaun (CNE-sigla portugés) nu’udar Órgaun Administrasaun Eleitorál (OAE) indenpendente haktuir iha Konstituisaun RDTL artigu 65, lei nú. 7/2016, lei ba OAE realiza ninia atividade servisu iha tinan 2021 hodi halo preparasaun ba aktu eleitorál ba Eleisaun Prezidensiál 2022.

Notísia Relevante: MAE relata preparasaun eleisaun prezidensiál 2022 ba PR

Tuir komunikadu imprensa ne’ebé Agência Tatoli asesu hosi Komisaun Nasionál Eleisaun haktuir, atividade sira-ne’ebe CNE realiza relasiona ho aktu eleitorál sira-ne’ebé mak hahú realiza iha tinan 2019 to’o ohin loron, mak dahuluk halo peskiza eleitorál iha tinan 2019 ho objetivu husu hanoin hosi eleitór sira kona-ba lala’ok eleitorál iha Timor-Leste.

Totál amostra ne’ebé CNE uza iha peskiza eleitorál iha tinan 2019 ne’e hamutuk 9.355 kompostu hosi mane 4.774 no feto 4.58. Amostra sira-ne’e hili proporsionalmente tuir númeru eleitór kada munisípiu inklui Rejiaun Administrativa Espesiál Oé-Cusse Ambeno (RAEOA).

Atividade daruak ne’ebé CNE hala’o mak programa edukasaun sívika 2020, ne’ebé realiza ba eleitór sira iha teritóriu nasionál iha 2020 ho objetivu atu promove esklaresementu ba sidadaun Timor-Leste hotu kona-ba aktu eleitorál.

Objetivu seluk mak ho razaun espesífiku tanba enkuadramentu legál sira-ne’ebe sai nu’udar regulamentasaun ba prosesu eleisaun iha Timor-Leste opta vota la’ós obrigatóriu ba sidadaun eleitór sira.

Rezultadu peskiza ne’ebe CNE halo hatudu katak eleitór barak seidauk partisipa iha edukasaun sívika no index demokrasia TL nian iha nivél mundiál di’ak ona, maibé infelzmente kualidade de partisipasaun ladún di’ak (haktur; The Economies Unit of Intelligence).

Totál partisipante sira-ne’ebe partisipa iha programa edukasaun sívika 2020 ne’’e hamutuk 26.342, kompostu hosi feto hamutuk 16.674 no mane iha 24.109. Fatin ba realizasaun edukasaun sívika iha eskola sekundária sira hamutuk 103, iha suku 95, organizasaun feto potensiál haat (4) no Polísia Nasionál Timor-Leste (PNTL) ida (1).

Atividade seluk ne’ebé CNE hala’’o mak realiza akordu ho United Nations Development Programme (UNDP) hodi konstrui eskritóriu munisípiu CNE nian iha Aileu, Baucau no Covalima.

CNE halo enkontru ho Sekretariadu Tékniku Administrasaun Eleitorál (STAE) iha 08 janeiru 2020 ho asuntu update informasaun kona-ba reativa sistema baze dadus RE-ABD tinan 2021.

Tuir mai, iha atividade CNE hala’o enkontru ho STAE iha 14 Abril 2021 ne’e ko’alia kona-ba preparasaun STAE iha periodu pre-eleitorál no update rekollamentu kartaun eleitorál ema mate no atividade durante periódu serka sanitária.

Hosi enkontru ne’e, CNE prepara ona relatóriu tuir obrigasaun normativa ne’ebe hakerek iha lei 7/2016, artigu 3, númeru 8, no CNE mós fó hanoin balu liga ho alterasaun lei eleleitorál sira, ba entidade relevante hanesan Ministeriu Administrasaun Estatál (MAE) no Parlamentu Nasionál (PN).

Aleinde ida-ne’e, nota ne’e afirma, CNE halo enkontru virtuál ho Rede dos Orgãos Jurisdicionais e de Administração Eleitoral (ROJAE) hodi partilla no manan esperiénsia hosi nasaun membru Comunidade dos Países de Língua Portuguesa (CPLP) inklui nasaun Áfrika sira seluk ne’ebé realiza ona eleisaun iha ámbitu pandemia COVID-19.

Nune’e mós, CNE halo auditória ba relatóriu prestasaun konta partidu polítiku kada tinan, ba Orsamentu Subvensaun Públika ne’ebe Estadu aloka tinan-tinan iha Orsamentu Jerál Estadu (OJE) liuhosi CNE ba partidu polítiku sira-ne’ebe iha asentu parlamentár ho montante orsamentu millaun $6, ne’ebe fahe proporsionalmente hanesan haktuir lei nú. 6/2008.

Notísia Relevante: Konstituisaun RDTL obriga kada tinan-lima tenke hili Prezidente Repúblika foun

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here