Família matebian Juga Gama, hein-hela iha sala izolamentu Vera Cruz, kinta (13/05/21).

DILI, 13 maiu 2021 (TATOLI)—Prizioneiru Juga Gama, hakotu-iis ho COVID-19, iha sala izolamentu Vera Crus, kinta (13/05).

Istória moras hosi matebian, durante iha prizaun Becora hanesan prizioneiru, Juga Gama sofre moras lepra ho tempu naruk, no matebian detetadu COVID-19 hosi ekipa vizilánsia, iha 11 maiu 2021.

Notísia relevante:Istória klínika matebian Olga Mendonça ho kategoria COVID-19 grave

”Iha tuku 17:00 otl, ami lori nia mai halo tratametu iha Sentru Saúde Becora. Antes ami transfere mai iha izolamentu Vera Cruz, ami kontaktu ona família. Durante iha prizaun laran, nia sofre moras dermatolojia ka moras kulit, hanesan lepra,” Diretór Estabelesimentu Prizaun Becora, João Domingos, hateten ba jornalista-sira iha sala izolamentu Vera Crus, kinta ne’e.

João Domingos konsidera matebian hanesan prizioneriu, ne’ebé ho komportamentu di’ak tebtebes, durante iha prizaun.

Ho komportamentu di’ak ida-ne’e, João Domingos haree katak, maski Juga Gama komete kazu ne’ebé todan, maibé garantidu, bainhira nia moris karik, marsu 2022 aprezenta ba Tribunál hodi husu liberdade kondisionál.

Iha fatin hanesan, família matebian, Abito Gama, hateten família hakarak tuir prosesu ne’ebé iha no desizaun ikus mak mate-isin entrega ba família hodi haloot tuir kultura família-nian.

”Mate-isin entrega ba ami, hodi haloot tuir kustume ne’ebé iha,” Abito Gama hateten.

Nia konta-tuir katak, família matebian simu informasaun hosi  sala  izolamentu Vera Cruz, iha tuku 16:00 otl, kona-bá realidade ne’e.

Juga Gama hakotu-iis ho idade 41, husik hela família no oan na’in-haat.  Tuir planu, família deside ona atu haloot mate-isin iha semitériu públiku Becusse, iha aban tuku 10:00 otl, no sei koordena ho parte Sentru Integradu Jestaun Krize (SIJK).

Tribunál Distritál Dili (TDD), iha 21 agostu 2020, kondena arguidu Juga Fernandes Xavier Gama, koñesidu ho naran ‘Juga Gama’ hamutuk  ho arguidu Aleixo Mendes Pereira, ho pena prizaun efetivu tinan-ida (1) no fulan-neen (6), tanba komete krime evazaun (dadur halai-sai) hosi prizaun Bacora, iha tinan 2013.

Notísia relevante:Juga Gama ho Aleixo Mendes hetan pena prizaun efetivu tinan-ida fulan-neen

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here