Autoridade sira lori fila Juga Gama husi Indonézia mai Dili. Imajen/Dok.Tatoli

DILI, 21 agostu 2020 (TATOLI)-Tribunál Distritál Dili (TDD), ohin, liuhusi desizaun final kondena arguidu Juga Fernandes Xavier Gama, koñesidu ho naran ‘Juga Gama’ no  arguidu Aleixo Mendes Pereira, pena prizaun efetivu tinan-ida (1) no fulan-neen (6) tanba komete krime evazaun (dadur halai sai) husi Prizaun Bacora iha tinan 2013.

Iha leitura akórdaun, Juis Argentino Nunes hateten, bazeia ba julgamentu liuhusi deklarasaun arguidu, testemuña no faktu Ministériu Públiku (MP) nian provadu katak iha loron 3   novembru 2013  iha Prizaun Becora, Postu Administrativu Cristo Rei, Munisípiu Dili, arguidu sira hala’o sai husi prizaun laran.

Antes ne’e, Padre Francisco Barreto halo misa iha Prizaun Becora  hamutuk ho prizioneiru sira iha loron refere, altura ne’ebá arguidu  Aleixo maka toma konta lori leitura, nune’e arguidu refere tur kedas iha parte oin kapela nian no arguidu Juga Gama, la hola parte iha selebrasaun misa tanba ho kondisaun moras.

Hafoin remata tiha misa, arguidu na’in-rua ko’alia ba malu hodi tenta atu halai sai husi prizaun. Nune’e, aproveita situasaun ne’e, arguidu sira tenta no konsege halai sai duni husi Prizaun Becora ba to’o iha estrada boot.

Kuandu arguidu na’in-rua to’o iha estrada boot, arguidu sira apropria tiha motorizada ida ho marka Mio, husi populasaun ne’ebé sirkula iha área refere.

Depois arguidu Aleixo Mendes Pereira maka kondús duni motorizada ne’e hodi tula arguidu  Juga Gama husi kotuk, hodi halai subar iha Comoro Mota-Ulun. Iha ne’ebá arguidu na’in-rua, hein to’o madrugada tuku 03:00 Otl, hafoin arguidu na’in-rua sa’e fali motoriza ba para iha ponte okos.

Antes ne’e, arguidu Aleixo apropria tiha osan ho montante $17 ne’ebé rai hela iha motor nia bagaze, hodi uza ba arguidu sira-nia nesesidade própriu.

Tuir mai arguidu sira husik hela motorizada ne’e iha ponte okos, kontinua hapara karreta iha Ponte Comoro, hodi sa’e ba to’o iha fronteira Motain. Depois arguidu sira pasa fronteira ilegálmente, hodi hakat liu ba iha nasaun viziñu Indonézia.

Ikus mai autoridade Indonézia ne’ebé servisu hamutuk ho autoridade Timor-Leste maka halo fali kapturasaun ba arguidu sira hodi mai Timor-Leste.

Tribunál hala’o konkursu norma  ba arguidu Aleixo Mendes Pereira  ba krime rua hanesan Furtu uza veíkulu (utiliza motor komunidade nian) no Furtu simples (uza osan ne’ebé rai iha motor bagaze laran ba an rasik) tanba faktu provadu.

Haree ba natureza krime rua ne’e  semi públiku depende ba keixa, tanba nain ka vítima la hato’o keixa, hanesan intervienentemente husi Ministériu Públiku la reprezenta lejitimidade laiha keixa hasoru arguidu Aleixo Mendes tanba ne’e Tribunál deside absolve arguidu husi kazu refere no Tribunál mós absolve arguidu (Aleixo ho Juga Gama) husi krime furtu agravadu ne’ebé antes ne’e MP imputa ba sira.

Tuir Tribunál, arguidu sira prátika aktu responsabilidade krime evazaun  (dadur halai sai) ne’ebé sujetivu no elementu krime konsidera provadu ne’ebé previstu iha artigu 246 kódigu penál Timor-Leste ho nia indetermidasaun pena prizaun bele to’o tinan-rua (2).

Tuir entendimentu Tribunál nian haree ba sirkunstánsia hotu ne’ebé agrava ignora antesedente  mezmu arguidu sira kumpre hela pena  maibé admite ho intensionalmente hodi halai sai husi prizaun.

Haree mós durante julgamentu arguidu sira konfesa ho parsialmente no arrepende ba hahalok sira no situasaun seluk arguidu sira iha  família fen no oan. Nune’e, Tribunál deside tuir konviksaun rasik aplika pena prizaun efetivu tinan-ida (1) no fulan-neen (6) ba arguidu na’in-rua.

Audiénsia  julgamentu ne’e, Ministériu Públiku reprezenta husi Prokuradór Jacinto Babo no Defensór Públiku auzente.

Jornalista   : Nelson de Sousa 

Editór        : Francisco Simões

HAKEREK NO HATÁN

Please enter your comment!
Please enter your name here