Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun SIJK, Rui Maria de Araújo. Imajen Tatoli/Egas Cristóvão.

DILI, 22 abríl 2021 (TATOLI)—Sala Situasaun Sentru Integradu Jestaun Krize (SIJK), fó-sai istória klínika hosi matebian Olga Mendonça (61) katak, rejistada kazu pozitivu COVID-19 ho kategoria grave.

“Matebian hanesan pasiente pozitivu SARS-COV-2, kazu ne’e konsideradu COVID-19 kategoria grave, no ekipa konjunta saúde deside enkamiña ba izolamentu Vera Cruz, hodi hahú tratamentu tuir protokolu médiku ne’ebé Timor-Leste adopta, inklui utiliza ventilasaun asistida liu hosi Continuous Positive Airway Pressure (CPAP),” Koordenadór Forsa-Tarefa ba Prevensaun no Mitigasaun, Rui Maria de Araújo,  relata liu hosi komunikadu, kinta ne’e.

Notísia relevante:COVID-19: Olga Mendonça sei haloot iha semitériu Becusse

Nia esklarese katak, kazu óbitu ida hosi Munisípiu Dili-nian ho nia istória klínika mak hanesan, feto ho idade 61, konfirmadu pozitivu SARS-CoV-2 iha 19 abríl 2021, iha Emerjénsia Hospitál Nasionál Guido Valadares (HNGV), ho cycle threshod (CT): N2 gene 31,7; E gene 30,1.

Matebian hela iha Lahane, Dili, ho istória isin-manas ho me’ar besik semana ida molok mai emerjénsia HNGV, no mós istória tensaun-a’as, ho diabetes ne’ebé la kontroladu.

Diagnóze traballu iha Emerjénsia HNGV, Acute Respiratoric Distress Syndrom  ka Sindroma insufisiénsia respiratória aguda.

Ohin 22 abríl 2021, dadersan tuku 08:25 otl, pasiente iis-kotu ho rezultadu test PCR post-mortem Pozitivu SARS-CoV-2 ho Cycle Threshold (CT) N2 Gene 33; E Gene 35.

Família matebian deside atu hakoi iha semitériu públiku Becusse, no ekipa konjunta funerál-nian, hosi Ministériu Saúde (MS), Ministériu Solidariedade Sosiál no Inkluzaun (MSSI) ho Ministériu Administrasaun Estaál (MAE) sei apoia tuir protokolu ne’ebé hala’o iha funerál ida iha semana kotuk, nune’e bele minimiza risku atu mosu kontájiu virus hosi matebian nia-isin ba fali ema seluk.

Notísia relevante:Xanana oferese kaixaun ba matebian Olga Mendonça

Jornalista: Felicidade Ximenes

Editór: Cipriano  Colo

HAKEREK NO HATÁN

Please enter your comment!
Please enter your name here