Projetu sidade universitáriu iha Aileu, prevee millaun $1.037,987 ba indemnizasaun
DILI, 11 maiu 2021 (TATOLI) – Ministériu Ensinu Superiór, Siénsia no Kultura (MESSK) prevee millaun $1.037,987 atu apoiu indemnizasaun ba abitante uma-kain 44 ho total ema 160 ne’ebé afetadu hosi projetu sidade universitáriu iha Munisípiu Aileu.
Notísia Relevante : Governu finaliza levantamentu dadus ba abitante afetadu Sidade Universitáriu Aileu
Projetu sidade universitáriu ne’e bainhira ezekuta, Ministru Ensinu Superiór Siénsia No Kultura (MESSK), Longuinhos dos Santos, hateten sei implika ba abitante-sira nia balun nia uma, sira-nia rai privadu no sira balun nia kintál ho ai-horis.
“Ami halo ona levantamentu dadus iha Munisípiu Aileu. Ami hetan família uma-kain 44 sei lakon uma no abitante 58 sei lakon ai-horis ho abitante 102 sei lakon rai, tanba ne’e ami prevee orsamentu indemnizasaun hodi prepara molok projetu sidade universitáriu Aileu ne’e realiza,” Ministru Longuinhos dos Santos, informa ba jornalista-sira, hafoin relata asuntu ne’e ba Primeiru-Ministru (PM), Taur Matan Ruak iha rezidénsia Estadu iha Faról, Dili, tersa ne’e.
Ministru Longuinhos dos Santos afirma katak ministériu prevee ona orsamentu ba indemnizasaun, maibé ba abitante 160 ne’ebé sei lakon ai-horis no rai, Ministériu seidauk halo kalkulasaun orsamentu indemnizasaun nian ba kada ema.
“Ministériu foin mak prevee de’it orsamentu ba uma-kain 44 ne’ebé sei lakon uma ho montante $458.655,” Longuinhos dos Santos hateten.
Nia hatutan, estudu viabilidade planu mestre ba futuru, maka projetu sidade universitáriu Aileu iha ona elaborasaun, inklui dezeñu sira iha ona ezbosu. Nune’e MESSK hein katak jullu, tinan ida-ne’e, bele aprezenta ona ba Konsellu Ministru hodi hetan apresiasaun.
Rona tiha aprezentasaun sira-ne’e hosi MEESK, PM Taur Matan Ruak, hato’o apresiasaun ba esforsu hotu no husu atu mantein nafatin ritmu servisu ne’ebé di’ak ona.
“Presiza liután maka atu rona nafatin parte komunidade ne’ebé afetadu ba projetu universitáriu Aileu, nune’e to’o tempu realiza prosesu indemnizasaun bele la’o ho di’ak,” Ministru Longuinhos dos Santos haktuir PM Taur nia lia-menon.
Notísia Relevante : Konsultór Bernabad Arquitectura Aprezenta Relatóriu Prelimináriu Sidade Universitáriu Aileu
Jornalista : Tomé Amado
Editór : Francisco Simões
