Ministru Ensinu Superiór, Siénsia no Kultura, Longuinhos dos Santos. Imajen TATOLI/Egas Cristovão

DILI, 16 dezembru 2020 (TATOLI)--Governu liuhosi Ministériu Ensinu Superiór, Siénsia no Kultura (MESSK) finaliza ona levatamentu dadus no reklamante ba abitante afetadu iha projetu konstrusaun Sidade Universitáriu Aileu.

“Atividade levantamentu dadus, iha segunda ne’e ita finaliza ona inklui reklamante sira, nune’e bele prosesa pagamentu ba família afetadu sira,” Ministru Ensinu Superiór, Siénsia no Kultura, Lounginhos dos Santos, iha Pálasiu Governu, kuarta ne’e.

MESSK sei analiza dadus hirak ne’e hafoin aprezenta iha reuniaun Konsellu Ministru hodi halo rezolusaun pagamentu indemnizasaun ba família afetadu sira.

“Ita analiza hotu tiha mak sei lori ba Konsellu Ministru atu halo rezolusaun ida, atubele define ninia kustu hafoin bele halo pagamentu ba komunidade afetadu,” nia realsa.

Totál afetadu ba projetu konstrusaun Sidade Universitáriu Aileu hamutuk família 44, maibé montante orsamentu ba indemnizasaun seidauk deside tanba sei hein rezolusaun hosi nível ezekutivu sira.

Mekanizmu idemnizasaun sei bazeia ba lei hanesan indemniza ba rai, ai-horis no uma.

“Bele mós ita fó ho montante orsamentu atu sira halo rasik uma no bele mós komunidade karik hakarak hela iha fatin ruma atu Governu define tuir tipu,” nia esplika.

Relasiona ho komunidade balun la aseita, tuir Ministru Longuinhos komunidade bele prosede ba justisa.

Iha tinan 2021, Governu liuhosi Ministériu Obra Públiku (MOP) no MESSK hahú finaliza estudu viabilidade no dezeñu enjeñeiru detalladu no halo indemnizasaun hafoin sei hahú halo konstrusaun iha 2022.

Diretór Nasionál Aprovizionamentu MOP, Quintiliano Afonso Belo, informa Governu komunika ona Konsultór internasionál Barnabad Arquitectura SLP ba projetu konstrusaun Sidade Universitáriu Aileu, atu finaliza estudu viabilidade no dezeñu enjeñeiru detalladu, ne’ebé MOP rasik prevee ona orsamentu hamutuk $550.000 ba kestaun ne’e.

Kompañia ne’ebé manán konkursu bele hala’o estudu viabilidade no dezeñu ho kualidade no padraun internasionál hodi ajuda Governu atu hala’o konstrusaun.

Tuir rekezitu, kompañia tenke iha kapasidade atu halo estudu viabilidade ba impaktu jeotékniku, ambientál, sósiu-ekonómiku, liuliu analiza ba fakuldade saida de’it mak atu loke ka muda ba iha munisípiu Aileu durante fulan-tolu to’o neen.

Kriasaun Sidade Universitáriu iha munisípiu Aileu nu’udar komprimísiu VIII Governu Konstitusionál, ne’ebé deskreve iha programa Governu, iha pájina 22, númeru 2.1.7 (Ensinu Superiór), alinea da-neen, katak hahú ona pasu dahuluk ba kriasaun Sidade Universitáriu iha munisípiu Aileu.

Atu minimiza movimentasaun ensinu superiór, hadau malu iha kapitál Dili tanba de’it hakarak kontinua ba universidade, maka Governu iha hanoin atu apoiu joven sira iha ensinu sekundária atu konsentra de’it ba Sidade Universitáriu ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here