Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 25 marsu 2021 (TATOLI)—Ministru Administrasaun Estatal, Miguel Pereira de Carvalho, hateten konsellu konsultivu munisipál sei kontinua diskute kandidatu sira-ne’ebé aprovadu ona ba Prezidente Autoridade Munisipál (PAM) tolu (3) no Administradór Munisipál rua (2) hafoin enkamiña ba desizaun koletiva Konsellu Ministru (KM).

Notísia Relevante: Fevereiru, kandidatu administradór munisípiu lima sei tuir ezame

Ministru Miguel fó-sai katak, oras ne’e autoridade munisipál no administrasaun munisípiu barak mak iha ona prezidente autoridade no administradór foun, hela de’it Autoridade Munisipál Dili, Ermera no Bobonaro, no Administrasaun Munisipál hela de’it Liquiçá no Manatuto.

“Rekrutamentu no ezame ba Munisípiu Dili nian hotu ona no munisípiu haat hanesan Bobonaro, Liquiçá, Ermera no Manatuto konklui ona. Hela de’it Konsellu Konsultivu Munisipál sei reune maibé agora serka sanitária tanba labele halibur ema barak iha reuniaun sira,” nia informa ba jornalista sira, iha Parlamentu Nasionál, kinta ne’e.

Nia hatutan, grupu traballu tékniku ministériu nian sei haruka karta ba Munisipál Dili no munisipál haat ne’e bele realiza konsellu konsultivu munisipál atu halo apresiasaun ba kandidatu aprovadu sira maibé sei hein serka sanitária ne’e termina.

Bainhira Ministru Administrasaun Estatal simu apresiasaun hosi munisípiu hirak ne’e, sei lori ba Konsellu Ministru hodi halo nomeasaun ba prezidente autoridade munisipál foun no administradór foun hirak ne’e.

“Bainhira kandidatu sé mak pasa iha ezame lori ba Konsellu Ministru no Konsellu Ministru mak halo deliberasaun ba kandidatu sira-ne’ebé mak bele sai administradór iha munisípiu sira,” nia dehan.

Ministru Administrasaun Estatal, Miguel Pereira de Carvalho, fó-sai katak prosesu rekrutamentu ba Prezidente Autoridade Munisipál (PAM) no Administradór Munisipál (AM) sira bazea ba méritu la’ós intervensaun polítika.

“Prosesu rekrutamentu ne’e laiha intervensaun polítika maibé rekrutamentu ne’e bazea ba méritu ne’ebé prevee iha dekretu Governu nian númeru 5/2016 nian, ne’ebé kandidatu sira prenxe kritéria mak hetan mellor klasifikada,” Ministru Miguel Pereira de Carvalho ko’alia ne’e hodi responde ba preokupasaun públiku durante ne’e.

Antes ne’e, Prezidente Autoridade Munisipál Dili nian iha kandidatu mak hanesan Guilhermina Filomena Saldanha liu ona iha selesaun eskrita ho valór ezame klasifikasaun kuantitativa 13.6 tanba resposta loos ba pergunta hamutuk 68.

Enkuantu kandidatu na’in-tolu seluk kompostu hosi Abílio Mesquita ‘Mausoko’, António Moniz Calau hetan valór hanesan 13.2 no Ivete de Fátima Sarmento de Oliveira, fó resposta loos ba pergunta hamutuk 66. Nune’e mós kandidatu Sabino da Costa hetan valór 11.8 tanba fó resposta loos ba pergunta hamutuk 59, kandidatu Manuel da Silva hetan valór 10 tanba fó resposta loos ba pergunta 50.

Entretantu, kandidatu hosi parte Munisípiu Liquiçá nian kompostu hosi António da Silva Pinto hetan klasifikasaun kuantitativa 12.4 fó resposta loos ba pergunta 62, João Alegria de Jesus hetan klasifikasaun kuantitativa 12.2 ne’ebé fó resposta loos ba pergunta 61.

Nune’e mós  João Barreto hetan klasifikasaun kuantitativa 15 tanba fó resposta ba pergunta 75 no Pedro Paulo Gomes hetan klasifikasaun kuantitativa 15.8 tanba fó resposta loos ba pergunta 79.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here