Primeiru-Ministru, Taur Matan Ruak. Imajen TATOLI/Egas Cristóvão

DILI, 06 maiu 2021 (TATOLI)—Sala Situasaun Sentru Integradu Jestaun Krize (SIJK) ne’ebé rejista númeru kazu pozitivu COVID-19 iha kapitál Dili aumenta makaas no kontajia fali ba Munisípiu sira seluk, mak VIII Governu Konsitusionál deside atu hala’o medida teste swab masal ba komunidade, nune’e bele minimiza númeru moras ne’e iha sosiedade nia leet.

Notísa Relevante: COVID-19: pozitivu 133, rekoperadu 34 no ativu 1.414

Primeiru-Ministru, Taur Matan Ruak, hateten asuntu ne’e bainhira hala’o enkontru semanál ho Prezidente Repúblika, Francisco Guterres Lú Olo, ne’ebé hala’o iha Palásiu Prezidensiál Nicolau Lobato, Bairru Pite, Dili.

“Ohin, ami ko’alia asuntu rua kona-ba dezastre naturál no COVID-19 ne’ebé númeru aumenta makaas loos. Kona-ba COVID-19 nian hanesan ita hatene katak Dili sai episentru COVID-19, tan nia espansa makaas no hosi ne’e mak kontajia fali ba munisípiu seluk. Ho ida-ne’e, Governu deside sei avansa ho medida teste swab masal no vasina ne’e sei halo barak mak iha Dili laran, nune’e bele minimiza númeru moras ne’e iha sosiedade nia leet,” Primeiru-Ministru hateten ba jornalista sira, hafoin halo enkontru ho Xefe Estadu, kinta ne’e.

COVID-19 aumenta makaas tanba iha fatór tolu, ida mak iha dezembru kazu iha Nusa Tenggara Timur (NTT) aumenta entaun Timor-Leste mós aumenta, fatór rua mak abitante sira barak mak tama-sai ilegál iha fronteira no fatór tolu mak akontese dezastre naturál iha loron 04 abril, entaun Timor-Leste mantein ho serka sanitária maibé konfinamentu obrigatóriu halo mamar tiha kuaze fulan ida entaun moras ne’e aproveita da’et.

“Agora ita atu hametin fali regra maibé ita tarde uitoan, entaun númeru aumenta maibé ita halo esforsu. Tanba ne’e, ha’u hakarak husu ba komunidade nia apoiu para halo kontrollu hodi hamenus númeru no ita mós avansa ho vasina ne’e para bele minimiza risku ba ita-nia sidadaun sira,” Taur Matan Tuak hateten.

Atu moras COVID-19 labele da’et makaas iha sosiedade nia leet, Xefe Governu ne’e husu ba komunidade atu koopera no kontribui hodi halo teste swab masal, nune’e bele identifika sedu no halo prevensaun ba moras ne’e ho lalais.

“Ha’u hanoin ita hotu nia-di’ak, ita tenke koopera halo teste swab masal para bele deteta lalais no halo prevensaun. Ita-boot sira hatene, ha’u de’it teste swab ba dala haat ona. Ha’u aban atu ba Balibo, sira dehan Primeiru-Ministru Taur Matan Ruak ba maibé kondisaun tenke teste swab. Ha’u dehan, ha’u prontu atu teste swab,” PM ne’e dehan.

Ba sidadun sira-ne’ebé lakohi koopera, Xefe Governu apela katak ba ema ida-idak nia moris no hakarak moris nafatin tenke halo sakrifísiu, nune’e husu ba inan-aman sira atu koopera tanba Governu la’ós atu halo buat ne’ebé aat ba ninia sidadaun sira, maibé Governu hakarak halo buat ne’ebé di’ak no lakohi ninia sidadaun sira mate tanba Timor-Leste mate na’in haat ona.

Priemiru-Ministru husu ba timor-oan sira tenke kuidadu tanba hosi tinan kotuk to’o tinan ne’e abitante afetadu hamutuk 2.000 resin, hafoin iha 1.3000 resin mak rekupera ona no 1000-resin sei nafatin no dadaun iha Vera Crúz kazu foun grave uitoan hamutuk na’in-lima.

“Ita-boot sira hatene foin semana ida-ne’e mak ita-nia orsamentu Prezidente Repúblika promulga no mós ita agora halo hela preparativu. Ita espera katak se preparativu sira hotu di’ak, pelumenus semana oin, ita komesa ona implementa. Maibé ita garante katak iha maiu nia-laran ne’e ita komesa halo implementasaun,” nia dehan.

Primeiru-Ministru, Taur Matan Ruak, informa horisehik aimoruk 20.000 hosi Australia no loron 18 maiu ne’e sei mai tan ho 10.000 ne’e maihosi nasaun Xina.

“Buat hotu di’ak mak sistema COVAX nian ne’ebé foin daudauk ita simu tiha 24.000 no sei mai tan 38.000. Se buat hotu la’o di’ak, se la’ós fulan ida-ne’e, fulan juñu ita sei simu 100.000 hosi Xina. Entaun simu besik 190.000 resin ba fulan maiu ho juñu pasu di’ak ona. Tanba ne’e vasina ne’e sei halo iha Dili mak barak liu,” nia afirma.

Notísia Relevante: EE da-XIII: sidadaun hotu iha territóriu nasionál obrigatóriu teste swab

Jornalista: Osóra Marques

Editór: Cancio Ximenes

HAKEREK NO HATÁN

Please enter your comment!
Please enter your name here