Primeiru-Ministru, Taur Matan Ruak, prezide reuniaun Konsellu Ministru, iha salaun Ministériu Finansa, Aitarak-laran, kuarta (05/05). Imajen TATOLI/Egas Cristóvão

DILI, 05 maiu 2021 (TATOLI)–Konsellu Ministru (KM) aprova ona Projetu Dekretu Governu ba alterasaun dahuluk Dekretu Governu númeru 14/2021 loron 29 abríl, kona-ba medida ezekusaun deklarasaun Estadu Emerjénsia (EE) ne’ebé efetua hosi Dekretu Prezidente Repúblika númeru 24/2021, loron 28 abríl.

“Ho alterasaun ida-ne’e, individuu hotu iha nasionál nia laran, abranje operasaun teste masál ka aleatória, tuir kritériu sira ne’ebé define hosi autoridade saúde nian, ne’ebé obrigadu atu realiza ezame médiku sira ba diagnóstiku COVID-19 ka infesaun husi SARS-CoV-2,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha auditoriu Ministériu Finansa, Aitarak-laran, kuarta ne’e.

Notísia relevante: Governu agradese apoiu PN autoriza estensaun EE da-XIII

Portavóz Governu ne’e dehan, bazeia ba Projetu Dekretu Governu ne’e, individuu sira ne’ebé lakohi halo ezame médiku hosi diagnóstiku obrigatóriu, sei iha responsabilidade kriminál no sujeita ba izolamentu profilátiku obrigatóriu iha estabelesimentu saúde, rezidénsia ka iha sentru izolamentu ne’ebé estabelese hosi entidade Estadu.

Iha kazu ida-ne’e, despeza relasiona ho izolamentu profilátiku responsabiliza hosi individuu rasik.

Enkuantu, sidadaun hotu iha nasionál ka estranjeiru ne’ebé hakarak tama iha territóriu nasionál tenke hato’o pedidu autorizasaun prévia.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here