Médiku-sira hala’o teste swab ba komunidade iha Sentru Formasaun Polísia (CFP) Comoro, tersa (04/05/21). Imajen Tatoli/António Gonçalves.

DILI, 05 maiu 2021 (TATOLI)—Sala Situasaun Sentru Integradu Jestaun Krize (SIJK), rejista kazu pozitivu COVID-19 hamutuk 133, rekoperadu 34 no ativu 1.414.

“Totál kazu konfirmadu kumulativu sura hosi 21 marsu 2020, hamutuk 2.786. Ohin iha kazu foun 133   detetadu iha Dili 109 no munisípiu seluk 24 ho totál kazu ativu 1.414,’’ Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, kuarta ne’e.

Notísia relevante:COVID-19: pozitivu 129, rekoperadu 69 no ativu 1.315

Hosi totál kazu detetadu foun ohin mane 74, feto 59, no pasiente ho idade tinan 12 na’in-tolu, entre tinan 12-59 na’in 127 (59,4%) ho idade 60 na’in-tolu ne’ebé sintomátiku 21,8%.

Proporsaun kazu sintomátiku durante loron hitu-nia laran, aumenta hosi mediana 8,8% iha semana rua liu bá,  mediana 15,1% ohin.

“Ida-ne’e hatudu tendénsia atu surtu COVID-19 iha Timor-Leste, avansa ba modelu ho predominánsia iha kazu sintomátiku,” nia subliña.

Hosi horisehik mai ohin, hamutuk hotu Laboratóriu Nasionál Saúde halo 1.160 testes PCR, ho detalla hanesan tuir-mai, Vijilánsia sentinela 34, Rastreiu ba kontaktu ka Contact tracing 94, Rastreiu Aleatóriu ka Random Screening 571, Viajen sai hosi serka sanitária Munisípiu Dili 459, Viajen internasionál rua, Follow up iha kuarentena laiha.

Totál teste PCR ne’ebé halo horisehik loron 4 maiu  iha Munisípiu sira seluk hamutuk 432, ho detalla hanesan tuir-mai, Baucau 136, Maliana 24, Maubisse 112, Suai 22,  Viqueque 72, Ermera 33 no RAEOA neen. Teste  follow-up  ba sira iha fatin  izolamentu 66, na’in 27 negativu ona no 39 sei nafatin pozitivu.

Tabela evolusaun surtu COVID-19 iha TL hahú loron 22 fevereiru 2021 tuir klasifikasaun transmisaun OMS nian, Aileu ualu  totál kumulativu  kazu rekuperadu ida,  totál kazu ativu ohin  hitu, kazu esporádiku, Ainaro 22, totál kazu iha oras 24 tolu, kazu rekoperadu ida,  kazu ativu ohin 21  kazu esporádiku.

Baucau 130, totál kazu iha oras 24 hamutuk 18, kazu rekoperadu 17, total kazu ativu ohin 113,  kazu  iha cluster. Bobonaro 17, kazu rekoperadu hitu, ativu ohin 10 kazu esporádiku.  Covalima 53, rekoperadu 18, kazu ativu ohin 35 kazu iha cluster.

Dili 2.386, totál kazu oras 24 iha 109, kazu rekoperadu 1.278, kazu ohin 1.104 totál kumulativu óbitu haat kazu iha transmisaun komunitária.

Ermera 49, kazu rekoperadu 12  ativu ohin 37 kazu iha cluster. Lautém 22, kazu iha oras 24 rua rekoperadu tolu, ativu 19 kazu esporádiku. Liquiça 15,  rekoperadu sia, ativu neen kazu esporádiku.

Manatuto neen, kazu iha oras 24 ida, rekoperadu ida, ativu lima  kazu esporádiku. Manufahi 52, kazu rekoperadu ualu, kazu ativu ohin 44 kazu iha cluster.

RAOEA hitu, rekoperadu haat, ativu  tolu kazu esporádiku. Viqueque 19, rekoperadu sia, ativu ohin 10 kazu iha cluster.

Evolusaun surtu COVID-19 iha Munisípiu Dili no Munisípiu sira seluk no mós RAEOA atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun, kada loron, pur abitante rihun 100, no hatudu risku ne’ebé populasaun iha atu hetan da’et moras ida. Hatudu kazu detetadu foun kada loron iha Timor-Leste tomak.

Ba ohin loron, hosi insidénsia COVID-19 iha Timor-Leste durante loron hitu ikus maka 6,6/abitante rihun 100, enkuantu ba de’it Munisípiu Dili ohin loron nian 22,5/abitante rihun 100.

Insidénsia iha leten sei nafatin hatudu katak, Munisípiu Dili mak fatin ho risku bo’ot liu atu populasaun hetan da’et no hada’et tutuan virus SARS-CoV-2.

Iha loron 05 maiu  2021, izolamentu Vera Cruz halo tratamentu ba kazu detetadu na’in 29. Iha área obstetrisia na’in-hitu, medisina interna na’in 17, pediatria na’in-lima.  Sira na’in-hitu iha obstetrisia, kategoria moderadu hotu, sira-nia kondisaun estável.

Sira na’in 14 iha medisina interna, haat  grave uza hotu oksijéniu, na’in 13  moderadu.  Hosi kazu lima  pediatria, haat moderadu, ida  grave. Na’in-ida grave uza CPAP, no haat  moderadu la uza ona oxijéniu.

Informa ba públiku katak, ema moras ne’ebé ba konsulta ka baixa iha HNGV, tenki halo teste PCR atu bele determina se nia infetadu ka la’e, hodi nune’e bele prevene hada’et tutan virus corona ba ema seluk iha ospitál laran.

Bainhira pozitivu, tratamentu ba ninia moras sei hala’o iha fatin izolamentu iha Vera Cruz, hosi médiku sira no tuir protokolu tratamentu ba ninia moras, ne’ebé uza iha HNGV.

Aproveita informa mós ba públiku katak, fatin atu halo teste PCR maka hanesan tuir mai, bainhira sente moras isin-manas, mear, kakorok moras ka sintoma seluk tan bele ba konsulta iha Sentru Saúde ne’ebé besik, atu bele halo swab.

Bainhira atu husu autorizasaun esepsionál sai hosi serka sanitária iha Dili bele ba halo swab iha Centro Convenções Dili (CCD).

Bainhira sente katak sai kontaktu-besik ba ema ruma ne’ebé detetau pozitivu ona, no seidauk hetan kontaktu hosi ekipa konjunta saúde bele liga ba númeru 119 atu organiza oin sá foti swab.

Ekipa Saúde na Familia (SnF) iha Sentru Saúde sira iha Dili, halo mós vizita ba bairru ho aldeia sira ne’ebé detetadu kazu barak ona. Sira ne’ebé iha sintoma, ka sente kontaktu besik ho kazu pozitivu ruma, bele hakbesik ba sira hodi halo swab.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here