AstraZeneca doses rihun 20 ne’ebé Austrália oferese, to’o ona Aeroportu Comoro, ho aviaun Qantas spirit Austrália VH-XZC, kuarta (05/05/21). Imajen Tatoli/António Gonçalves.

DILI, 05 maiu 2021 (TATOLI)—Governu liu hosi Ministra Saúde (MS), Odete Maria Freitas Belo, agradese ba Governu Australianu, ne’ebé oferese vasina AstraZeneca doses rihun 20, hodi asegura imunidade pesoál liña frente iha Timor Leste (TL) hosi COVID-19.

Sentidu gratidaun ne’e Odete Maria Freitas Belo espresa, iha serimónia entrega ne’ebé hala’o iha Aeroportu Internasionál Prezidente Nicolau Lobato, Comoro, Dili, kuarta ne’e.

Notísia relevante:Ema hamutuk 28.678 simu ona vasina AstraZeneca

“Lori Governu TL, agradese ba apoiu ida-ne’e. Agradese mós ba apoiu hosi ajénsia no doadór-sira ne’ebé durante ne’e hatudu liu hosi serbisu hamutuk iha tempu difísil-nia laran,” Odete Maria Freitas Belo, agradese.

Nune’e mós Embaixadór Austrália iha TL, Peter Roberts, apresia ho parte Ministériu Saúde ne’ebé oferese ona vasina AstraZeneca ba pesoál liña  frente-sira iha nasaun ne’e, nune’e Austrália hatudu mós ninia solidariedade atu luta hamutuk hodi kontinua kombate COVID-19, liu hosi oferese AstraZeneca doses rihun 30, ohin, doses rihun 20 to’o ona Dili ho aviaun Qantas spirit Austrália VH-XZC.

”Ohin, doses rihun 20 mak to’o ona no semana rua tan ita sei transporta doses rihun 10 mai tan,” Peter Roberts, informa.

Peter Roberts konsidera apoiu ida-ne’e hanesan kompromisu hosi Austrália atu tulun Governu TL, nune’e bele oferese vasina ba populasaun ho pursentu 80, ne’ebé la kobre hosi COVAX facility.

Nia esplika, AstraZeneca doses rihun 20 ne’e, pordúz iha Austrália no povu australianu mós hetan vasina ne’e.

“Ha’u hein atu simu vasina ne’e iha lansanentu ne’ebé Ministériu Saúde sei realiza iha semana oin. Ami sei kontinua apoia liu hosi Unicef, hodi kobre populsaun TL,” nia promete.

Diplomata ne’e sente kontente tanba, alende oferese AstraZeneca doses rihun 20, ohin mós oferese materiál balun ba Laboratóriu Nasionál Saúde (LABNAS), hodi reforsa serbisu vizilánsia.

Notísia relevante:Vasina AstraZeneca nu’udar medida únika halo prevensaun hasoru COVID-19  

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here