Ema hamutuk 28.678 simu ona vasina AstraZeneca

DILI, 01 maiu 2021 (TATOLI)-Vise-Koordenadora Forsa Tarefa Prevensaun Metigasaun Surtu COVID-19,  Odete da Silva Viegas, informa to’o ohin loron, ema ne’ebé mak simu ona vasina AstraZeneca iha nivel nasionál hamutuk 28.678.

‘’Ohin loron ema ne’ebé mak vasina iha nivel nasionál hamutuk 28.678 kuaze iha Munisípiu hotu-hotu  100% ona iha vial balun ida rua maka sei iha atu atende ba iha profisionál saúde sira ne’ebé mak halo servisu iha izolamentu  no kuarentena sira,’’ Odete da Silva Viegas informa ba Agência Tatoli iha Fatuhada, Dili, sabadu ne’e.

Nia dehan, ema sira  ne’ebé mak durante vasina iha primeira faze  sira hetan reasaun  hamutuk ema na’in-11 no hosi  ema na’in-11 ne’e na’in-ida moderadu no ida grave, sia seluk reasaun isin  manas hanesan baibain.

‘’Ida grave ne’e ita sempre hateten reasaun  alérjika depois  vasina mak syok anafilaktik entaun ida ne’e ita-nia profisionál saúde ida depois nia hetan ida ne’e ba Ospitál atende oksijéniu no nia rekupera fila fali,” Odete esplika.

Sira na’in- sia ne’e  mak level hanesan isin manas,  isin kolen no moras iha sona fatin, maibé   faze dahuluk ho mil 24 doses ne’e  lao ho susesu maske  ema balun tau kestaun ne’e normál.

Jornalista   : Felicidade Ximenes

Editór        : Francisco Simões