Clara Pereira. Imajen Tatoli/Eugénio Pereira.

DILI, 04 maiu 2021 (TATOLI)—Polísia Nasionál Timor Leste (PNTL), liu hosi Polísia Serbisu Investigasaun Kriminál (PNSIK), bolu ona Clara Pereira nu’udár uma-na’in iha Colmera, atu presta deklarasaun kona-bá selebrasaun aniversáriu ne’ebé foin lalais virál iha média sosiál.

Clara Pereira rekoñese katak, festa aniversáriu ne’ebé nia parte realiza foin lalais ne’e, laiha koñesimentu hosi polísia.

Notísia relevante:PNTL seidauk bele ko’alia kona-bá festa iha Colmera

“Laiha. Tanba ne’e mak ha’u mai koopera ho polísia hodi klarifika situasaun ne’e,” Clara Pereira, hateten ba jornalista-sira iha edifísiu PNSIK, Caicoli, Dili, kuarta ne’e. 

Durante iha PNSIK, Clara Pereira klarifika ba investigadór-sira katak, atuál Prezidente Parlamentu Nasionál (PPN), Aniceto Longuinhos Guterres ho espoza Maria Natercia Gusmão, la partisipa iha serimónia ne’e.

“Ha’u mai aprezenta deklarasaun iha polísia, hodi klarifika informasaun ba públiku katak, PPN, Aniceto Longuinhos Guterres ho-nia espoza la partisipa iha festa ne’e. Informasaun ne’ebé ema partilla iha média sosiál, ne’e informasaun falsa,” Clara Pereira, klarifika.

Nu’udár festa na’in, Clara Pereira rasik aprezenta mós keixa ba PNSIK atu halo investigasaun ba autór ne’ebé lansa informasaun falsa iha média sosiál.

Iha fatin hanesan, Komandante PNSIK, Superintendente Xefe, José Neto Moc, seidauk bele fó komentáriu tanba prosesu investigasaun sei la’o hela.

Tuir ajenda, PNSIK sei halo mós investigasaun profunda ba autór ne’ebé lansa informasaun iha média sosiál.

Antes ne’e, PNSIK rasik simu ona keixa hosi Prezidente Parlamentu Nasionál, Aniceto Longuinhos Guterres, katak, laiha koñesimentu kona-bá festa ne’e.

Entretantu, imajen kona-bá selebrasaun festa aniversáriu ida iha rezidénsia ida iha área Colmera, hahú espalla iha média sosiál, iha segunda (03/05/21).

Iha loron 29 abríl 2021, Konsellu Ministru aprova, ho alterasaun, projetu Rezolusaun Governu ba impozisaun konfinamentu domisiliáriu jerál ba ema hotu-hotu ne’ebé hela iha Munisípiu Dili, tenke hela iha uma ka iha alojamentu temporáriu, hahú hosi tuku 00:00 loron 30 abríl to’o tuku 23:59 loron 13 maiu, 2021.

Rezolusaun Governu kona-bá impozisaun konfinamentu domisiliáriu jerál, sita mós katak, autoridade polisiál fiskaliza kumprimentu ba regra ne’ebé hatuur ona iha Rezolusaun ne’e, aviza infratór-sira bainhira la kumpre Rezolusaun ne’e, konsidera prátika krime dezobediénsia.

Autoridade polisiál sei komunika ba Ministériu Públiku kona-bá identidade hosi ema ne’ebé, hafoin avizu ne’ebé prevee iha fraze anteriór no kontinua la respeita regra ne’ebé prevee ona iha Rezolusaun Governu.

Bainhira ema hosi estranjeiru la respeita  regra-sira ne’ebé prevee iha Rezolusaun Governu ne’e, autoridade polisiál sei komunika sira-nia identidade ba Serbisu Migrasaun.

Rezolusaun ne’e mós bandu movimentu transporte públiku iha área-sira hotu iha Munisípiu Dili, liuliu, mikrolete, taxi no anguna.

Bandu atividade relijioza ne’ebé implika ezisténsia ema halibur-malu. Ba efeitu Rezolusaun Governu ne’e, konsidera nu’udár ema halibur-malu  liu hosi na’in-rua, tenke iha distánsia fízika menus hosi metru rua.

Notísia relevante:PPN laiha koñesimentu ba festa no keixa ona ba PNTL

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here