Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo. Imajen Tatoli/Eugénio Pereira.

DILI, 04 maiu 2021 (TATOLI)—Polísia Nasionál Timor-Leste (PNTL), seidauk bele fó komentáriu kona-bá preokupasaun públiku, liga ho sidadaun balun festeza selebrasaun aniversáriu iha rezidénsia ida, iha área Colmera, Dili.

Tanba ne’e parte Komandu Jerál PNTL, sei koordena ho Komandu Munisípiu Dili, atu loke prosesu investigasaun ba asuntu ne’e.

Notísia relevante:PNTL sei tama-sai bairru no kriminaliza dezobediénsia ba regra

“Kona-bá festa ne’e, ha’u seidauk bele ko’alia. Maibé, sei buka informasaun hodi fó-sai duni atu bele hatene,” Portavóz Komandu Jerál PNTL, Superintendente Xefe, Arnaldo de Araújo, hateten ba jornalista-sira iha Sentru Formasaun Polísia (CFP sígla portugés) Comoro, tersa ne’e.

Nia mós rekoñese katak, iha imajen balun ne’ebé espalla iha média sosiál kona-bá, ema halo festa iha Colmera ho prezensa banda múzika balun.

Kestaun ne’e nia dehan, sai mós preokupasaun ba PNTL hodi buka hatene, tanba TL aplika hela regra Estadu Emerjénsia no Serka Sanitária liuliu iha Dili.

“Estadu TL implementa hela Serka Sanitária, tanba ne’e husu ema hotu tenke kumpre konfinamentu domisiliáriu, katak, labele hosi uma,” nia subliña.

Superintendente Xefe, Arnaldo de Araújo, esplika Timor-Leste (TL) implementa hela Estadu Emerjénsia no Serka Sanitária iha kapitál Dili no munisipiu, ho regra klaru katak, bandu komunidade atu halo festa, partisipa lia adat, selebrasaun misa no atividade-sira ne’ebé halibur ema barak, tanba bele fó risku ba transmisaun peste letál COVID-19.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here