Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 04 maiu 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, laiha koñesimentu ba festa ida iha Colmera no oras ne’e keixa ona ba komandu Polísia Nasionál Timor-Leste (PNTL) hodi buka justisa ne’ebé justa ba publikasaun sira iha rede sosiál (facebook).

Liuhosi komunikadu imprensa ne’ebé Agência TATOLI asesu, tersa ne’e, Xefe Gabinete PPN, Alícia Amaral Sarmento, klarifika ba públiku kona-ba informasaun ne’ebé fó-sai iha loron 03 maiu 2021 iha mídia sosial.

Xefe Gabinete PPN ne’e konsidera publikasaun ne’e tendénsia dezakredita no difama PPN, tanba publikasaun hanesan ne’e intensionalmente atu lansa propaganda hodi konstroe persepsaun ne’ebé negativu ba públiku.

“Ami hakarak esplika tuir maine’e: Publikasaun ne’e hatudu tendénsia dezakredita no difama kargu órgaun soberania ne’ebé señor Aniceto Longuinhos Guterres Lopes asume. Karik iha duni festa ruma, ne’e la’ós Prezidente Parlamentu nia responsabilidade, tanba Prezidente la hatene no laiha ligasaun ho festa ne’e,” Xefe Gabinete PPN klarifika.

Iha komunikadu ne’e, Xefe Gabinete PPN subliña, karik iha duni festa hanesan publikasuan ne’e husu ba autoridade polisiál kompetente foti medida hasoru ema sira-ne’ebé organiza no envolve iha festa ne’e.

Tanba viola Lei númeru 7/2021, 28 abríl kona ba Deklarasaun Estadu Emerjénsia, alínea c), artigu 4 ne’ebé hateten autoridade públika kompetente bele impoin medida ba hamenus risku kontájiu no halo medida prevensaun no kombate epidemia, inklui limita ka proibe realizasaun reuniaun sira no manifestasaun ne’ebé halibur ema ho poténsia transmite moras SARS-CoV-2, ne’e konstitui ona krime dezobediénsia.

“Ohin kedas, Prezidente Parlamentu Aniceto Longuinhos Guterres Lopes, halo mós keixa ba Komando Jerál PNTL no Polísia Investigasaun Kriminál hodi foti medida hasoru hahalok sira viola lei no orden públika,” Xefe Gabinete Alícia Amaral Sarmento hateten.

Hatán ba kestaun ne’e, Iskeru Firaku Sertimor ba Agência TATOLI, prontu responsabiliza ba publikasaun ne’e.

“Ha’u mak ne’e, buat ne’e iha evidénsia no iha vídeo iha-ne’ebá mak ha’u públika, maibé ha’u la temi nia (Aniceto Guterres) tanba nia família mak halo festa la’ós nia,” Iskeru argumenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here