Membru PNTL hala’o pasa revista ba komunidade ne’ebé la uza máskara, dokumentu, no husu objetivu viajen. Pasa revista ne’e hala’o iha área rotunda, estátua Prezidente Nicolau Lobato, Comoro, segunda (03/05/21). Imajen Tatoli/António Gonçalves.

DILI, 03 maiu 2021 (TATOLI)—Polísia Nasionál Timor Leste (PNTL) hasai ona desizaun atu hola medida forte ba abitante kapitál Dili, ne’ebé kontinua movimentu no la kumpre regra Serka Sanitária.

Komandante Operasaun Nasionál PNTL, Superintendente Xefe, Pedro Belo rasik halo ona aprezentasaun ba Komandu PNTL, kona-bá mapamentu implementasaun Serka Sanitária.

Notísia relevante:PNTL blokeia movimentu transporte públiku iha Dili

Pedro Belo alerta ba membru-sira atu serbisu ho responsabilidade, hodi sensibiliza komunidade kona-bá regra Serka Sanitária, liuliu ba abitante ne’ebé hala’o hela negósiu ka tenke hapara komunidade ne’ebé uza transporte hodi halo movimentu iha Dili, atu bele prevene transmisaun surtu COVID-19.

Komandu PNTL mós fahe ona forsa atu halo sensibilizasaun ba komunidade iha Dili, hodi kumpre Rezolusaun Governu ba impozisaun konfinamentu domisiliáriu jerál iha Munisípiu Dili, hahú hosi 30 abríl to’o 13 maiu 2021.

Tuir observasaun Agência Tatoli, hahú 01 to’o 02 maiu, Komandu PNTL liu hosi Unidade Espesiál Polísia (UEP) no Polísia Dili, hahú sosializasaun regra ba komunidade no mós ohin dadeer hahú ona operasaun rigorozu iha Dili.

Xefi ekipa Apoiu Kuartél Jerál PNTL, Superintendente Polísia, António da Luz, husu ba komunidade atu kumpre regra.

“Hahú aban, ba sira ne’ebé ba serbisu atu la’o lori karta autorizasaun hosi sira-nia diretór inklui ekipa liña frente rasik. Bainhira laiha karta autorizasaun, ita sei foti medida forte tanba ida-ne’e regra Governu,” António da Luz alerta liu hosi komunikadu, segunda ne’e.

Atuál Komandante Polísia Komunitária Nasionál ne’e, kontinua apela ba komunidade atu obrigatoriamente uza máskara ho loloos, fase liman bainhira tama iha fatin públiku no kumpre distánsia sosiál.

PNTL la tolera abitante ne’ebé halo atividade ezersísiu, la’o ain no bisikleta sei detein tuir lei.

Nune’e mós, Segundu Komandante PNTL Dili, Superintendente Euclides Belo, dehan, hahú 01 maiu dader, PNTL detein abitante na’in 20-resin ne’ebé halo ezersísiu tanba konsidera kontra regra serka sanitária.

Abitante hirak-ne’e PNTL lori ba Komandu Caicoli, hodi halo investigasaun no sensibiliza kona-bá regra, ikus-mai haruka sira fila ba uma atu kontinua kumpre regra.

Alende ne’e, membru UEP mós kontinua halo patrrulamentu iha kalan, hodi bandu grupu joventude ne’ebé tuur halibur-malu iha fatin públiku, hanesan Palásiu Governu, Jardín Motaél no tasi-ibun.

Notísia relevante:PNTL sei asegura implementasaun konfinamentu domisiliáriu

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here