Membru PNTL hala'o hela seguransa iha pontu entrada Tasi-tolu, sesta, (19/03/21). Imajen Tatoli/António Gonçalves.

DILI, 30 abríl 2021 (TATOLI)—Polísia Nasionál Timor Leste (PNTL) liu hosi Komandu Munisípiu Dili, koopera ho Departamentu Nasionál Trânzitu no Seguransa Rodoviária (DNTSR), hahú ohin blokeia movimentu transporte públiku, atu labele halo sirkulasaun iha no sai hosi Dili.

Komandante PNTL Munisípiu Dili, Superintendente Xefe, Henrique da Costa, fó-sai orientasaun ne’e tanba hakarak atu asegura implementasaun rezolusaun Governu kona-bá konfinamentu domisiliáriu jerál iha Dili.

Notísia relevante:PNTL sei asegura implementasaun konfinamentu domisiliáriu

“Hahú ohin transporte públiku hanesan, taxi, mikrolete, bus, no angguna, labele tama mai Dili no mós labele movimentu iha Dili laran,” Henrique da Costa, hateten liu hosi konferénsia imprensa, iha Caicoli, sesta ne’e.

PNTL sei la tolera motorista-sira ne’ebé kontinua halo movimentu tula pasajeiru, no polísia sei halo apreensaun ba transporte hodi selu multa tuir lei.

“Se mak la kumpre, ita sei foti medida atu regula tuir lei ne’ebé vigora,” nia alerta.

Entretantu, alterasaun projetu rezolusaun Governu ba impozisaun konfinamentu domisiliáriu jerál iha munisípiu Dili, hahú tuku 00:00 loron 30 abríl 2021, to’o tuku 23:59 loron 13 maiu 2021.

Rezolusaun Governu ne’e, bandu mós populasaun no transporte públiku labele halo movimentu iha Dili no sai ba munisípiu seluk, eseptu iha kazu sira ho fundamentu forte tanba seguransa públika, saúde públika, asisténsia umanitária, manutensaun hosi sistema abastesimentu públiku, ka razaun seluk ne’ebé presiza hala’o interese públiku.

Jornalista: Eugénio Pereira.

Editór: Cipriano Colo

HAKEREK NO HATÁN

Please enter your comment!
Please enter your name here