Portavóz Komandu Jerál Polisia Nasionál Timor-Leste, Superintendente Xefe, Arnaldo de Araújo. Imajen Tatoli/Eugénio Pereira.

DILI, 30 abríl 2021 (TATOLI)—Polísia Nasionál Timor-Leste (PNTL) sei asegura implementasaun rezolusaun Governu kona-bá konfinamentu domisiliáriu jerál, hodi blokeia movimentu abitante no transporte-sira tuir desizaun ne’ebé iha.

Portavóz Komandu Jerál PNTL, Superintendente Xefe, Arnaldo de Araújo, informa Komandu Jerál alerta ona ba Komandu Munisipiu hotu-hotu, atu hala’o pasa revista makaas iha terenu durante periúdu konfinamentu domisiliáriu.

Notísia relevante:PNTL detein pasiente na’in-haat baku médiku iha izolamentu Tasi-tolu

Arnaldo de Araújo esplika, Governu hasai ona desizaun kona-bá medida ezekusaun ba Deklarasaun Estadu Emerjénsia, ne’ebé efetua hosi dekretu Prezidente Repúblika númeru 24/2021, loron 28 abríl, hodi hatán ba surtu COVID-19.

Estadu emerjénsia, ne’ebé renova daudaun abranje teritóriu nasionál tomak no vigora entre oras 00:00 loron 3 maiu no oras  23:59 loron 1 juñu 2021.

“PNTL sei asegura implementasaun Estadu Emerjénsia no konfinamentu domisiliáriu jerál. Ami husu ba sidadaun hotu tenki hamatek no labele sai hosi uam,” Portavós PNTL, Arnaldo de Araújo, hateten liu hosi konferénsia imprensa iha Komandu Jerál PNTL, Caicoli, sesta ne’e.

PNTL mós bandu populasaun atu halo movimentu tama iha Dili no sai ba munisípiu seluk, husu ba loja sira ne’ebé la fa’an sasán ka serbisu esensiál-sira tenki taka, eskola hotu-hotu no atividade Igreja-nian tenki taka, tranporte públiku labele hala’o viazen.

“La autoriza transporte hala’o atividade tula pasajeiru ka viazen ba mai. Se mak la kumpre, ami sei foti asaun tuir lei,” nia alerta.

Entretantu, projetu rezolusaun Governu ba renovasaun impozisaun serka sanitária iha munisípiu sia (9) hanesan Ainaro, Baucau, Dili, Ermera, Covalima no Viqueque, ba loron 14-tan, hahú 30 abríl tuku 23:59 otl, to’o 16 maiu 2021.

Aprova mós impozisaun serka sanitária iha munisípiu Lautém, Liquiçá, Manufahi, entre tuku 00:00 iha 30 abríl 2021 to’o tuku 23:59 loron 16 maiu 2021.

Nune’e, bandu sirkulasaun ema entre munisípiu hirak-ne’e eseptu iha kazu sira ho fundamentu forte tanba seguransa públika, saúde públika, asisténsia umanitária, manutensaun hosi sistema abastesimentu públiku, ka razaun seluk ne’ebé presiza hala’o interese públiku.

PNTL husu ba populasaun atu proteje aan hodi kumpre regra sira hanesan, fase liman ho sabaun, taka ibun no inus bainhira me’ar, evita ba fatin públiku no limita tempu iha espasu ne’ebé taka metin no seluk tan.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here