Sekretáriu Jerál Parlamentu Nasionál, Adelino Afonso Gomes. Imajen TATOLI/Evaristo Soares Martins.

DILI, 30 abríl 2021 (TATOLI)—Sekretáriu Jerál Parlamentu Nasionál, Adelino Afonso de Jesus, fó-sai katak prosesu harii edifísiu própriu Parlamentu Nasionál (PN) nian tama ona iha faze estudu viabilidade no dezeñu.

Notísia Relevante: Prioridade PN 2021 sei prodús lei, halo fiskalizasaun no harii edifísiu foun

Nia hatutan, orsamentu privativu prevee tiha millaun $3 maibé iha orsamentu retifikativu foin lalais sofre alterasaun millaun $2,5 entaun verba kapitál dezenvolvimentu hosi Parlamentu Nasionál nian hela de’it rihun $500.

Maibé, nia subliña, faze estudu viabilidade no dezeñu prevee ona iha Fundu Infraestrutura ho rihun $240.

“Edifísiu Parlamentu Nasionál agora daudaun iha faze estudu no dezeñu. Estudu no dezeñu ne’e osan iha Fundu Infraestrutura ne’ebé orsamentu tiha ona dezde tinan rua liubá, hamutuk rihun $240. Osan ne’e sufisiente halo faze preliminária estudu no dezeñu ne’e,” nia informa ba jornalista sira, iha Parlamentu Nasionál, sesta ne’e.

Sekretáriu Jerál Parlamentu Nasionál ne’e dehan, edifísiu própriu PN ne’e sei harii iha foho-leten área Tasi Tolu nian.

“Fatin ne’e, iha tasi tolu parte foho-leten. Oras ne’e sei tama iha konsolidasaun faze estudu viabilidade. Rai ne’e Estadu nian ho ektare 38,” nia dehan.

Entretantu iha loron 19 agostu 2020 liubá, Prezidente Parlamentu Nasionál, Deputadu Aniceto Longuinhos Guterres Lopes, hateten vizaun atu harii edifísiu própriu Parlamentu Nasionál inklui rezidénsia ba deputadu sira tanba kada lejizlatura gastu ba subsídiu boot tebes.

“To’o agora deputadu ida simu $450 ba alojamentu kada fulan, tinan ida (1) deputadu ida hetan $5.400, tinan ida deputadu 65 hetan $351.000,00. Iha  lejizlatura ida (tinan 5) Estadu gasta S1.755.000,00 ba dei’t alojamentu. Bainhira harii duni redús ka elimina total orsamentu ida-ne’e  entaun presiza duni rezidénsia ba deputadu besik kedas sede Parlamentu Nasionál. Kestaun seluk mak efikásia tempu servisu,” Prezidente Parlamentu Nasionál argumenta iha momentu ne’ebá.

Nia afirma, públiku hatene ona kona-ba frakeza kumprimentu oras servisu deputadu sira. Razaun barak liu kona-ba inkumprimentu oras servisu ne’e mak distánsia hela-fatin ho sede Parlamentu Nasionál ne’ebé dook ba deputadu lubuk ida.

Deputadu Aniceto Guterres subliña, deputadu sira presiza kumprimenta rigorozu oras servisu kondisiona ho fatin no fasilidade servisu ne’ebé adekuadu sei produz rezultadu ne’ebé ho kualidade di’ak liután iha futuru.

“Ne’e duni sede Parlamentu Nasionál, rezidénsia ba deputadu, fasilidade no kondisaun adisionál seluk ne’ebé relevante presiza hanoin no tetu agora para lori ita hotu kontribui ba forma ita-nia Parlamentu Nasionál ho deputadu ne’ebé dezempeña servisu ho kualidade di’ak liután iha future,” nia hateten.

Notísia Relevante: Vizaun atu harii edifísiu própriu PN tanba kada lejislatura gasta $1.755.000,00

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here