Prezidente Parlamentu Nasionál, Aniceto Longuinhos Guterres Lopes, observa hela esketsa futuru edifísiu própriu Parlamentu Nasional. Esketsa dezeña ne’e hala’o iha lejislatura dahuluk nia tempu. Imajen/Evaristo Soares Martins.

DILI, 19 agostu 2020 (TATOLI)—Prezidente Parlamentu Nasionál, Aniceto Longuinhos Guterres Lopes, hateten vizaun atu harii edifísiu própriu Parlamentu Nasionál inklui rezidénsia ba deputadu sira tanba kada lejislatura gastu ba subsídiu boot tebes no Estadu gasta $1.755.000,00 ba de’it alojamentu. 

Notísia Relevante: Aniceto Guterres: “Edifísiu foun PN sei poupa subsídiu hosi deputadu sira”

“To’o agora deputadu ida simu $450 ba alojamentu kada fulan, tinan 1 deputadu ida hetan $5.400, tinan ida deputadu 65 hetan $351.000,00. Iha  lejislatura ida (tinan 5) Estadu gasta $1.755.000,00 ba dei’t alojamentu. Bainhira harii duni reduz ka elimina total orsamentu ida-ne’e, entaun presiza duni rezidénsia ba deputadu besik kedas sede Parlamentu Nasionál. Kestaun seluk mak efikásia tempu servisu,” Prezidente Parlamentu Nasionál, Deputadu Aniceto Longuinhos Guterres Lopes, informa liuhosi Konferénsia Imprensa, Salaun Konferénsia Parlamentu Nasionál, kuarta ne’e.

Nia dehan, públiku hatene ona kona-ba frakeza kumprimentu oras servisu deputadu sira ne’e, razaun barak liu kona-ba inkumprimentu oras servisu ne’e mak distánsia hela-fatin ho sede Parlamentu Nasionál ne’ebé dook ba deputadu lubuk ida.

Deputadu Aniceto Guterres hateten, deputadu sira presiza kumprimenta rigorozu oras servisu kondisiona ho fatin no fasilidade servisu ne’ebé adekuadu sei produz rezultadu ne’ebé ho kualidade di’ak liután iha futuru.

“Ne’e duni sede Parlamentu Nasionál, rezidénsia ba deputadu, fasilidade no kondisaun adisionál seluk ne’ebé relevante presiza hanoin no tetu agora para lori ita hotu kontribui ba forma ita-nia Parlamentu Nasionál ho deputadu ne’ebé dezempeña servisu ho kualidade di’ak liután iha futuru,” nia dehan. 

Prezidente Parlamentu Nasionál, Deputadu Aniceto Longuinhos Guterres Lopes, hateten ideia atu konstrui edifísiu própriu Parlamentu Nasional nian hahú kedas dezde plejizlatura dahuluk to’o agora, la’ós hanoin foun ka inventa nesesidade foun hodi gastu osan estadu nian no ignora povu nia kondisaun moris.

Nia haktuir, iha lejizlatura hirak uluk halo ona estudu balu no esketsa edifísiu no panorama aredór sede Parlamentu Nasionál, identifika fatin balu hanesan iha Tasi-Tolu, iha Palásiu Prezidente Repúblika nia kotuk, Bairru Pité no iha eis-edifísiu finansa Kaikoli maibé seidauk hahú konstrusaun.

Ho hanoin no inisiativa sira la’o ona kona ba futuru edifísiu Parlamentu Nasionál mak Prezidenti Parlamentu Nasional atuál hahú esplora posibilidade espasu liuhosi komunikasaun ho Ministru Justisa, atu identifika espasu ne’ebé razoável fora hosi sidade Dili, ho vizaun no konseitu espasu Parlamentu Nasional ne’ebé integradu.

Nia esplika, integradu signifika iha espasu ne’ebé natoon ba edifisiu Parlamentu Nasionál ho kondisaun ba unidade orgánika parlamentár, ba unidade orgánika  administrasaun parlamentár ba deputadu idak-idak atu hala’o sira-nia funsaun ho efetivu no iha espasu ba atendimentu dignu sidadaun sira-ne’ebé ba hasoru sira-nia reprezentante inklui vizitante seluk.

Situasaun seluk mak atu mantein deputadu sira besik nafatin ho sira-nia família tanba reprezentante povu hanesan agora no iha futuru, barak mak mai husi munisípiu no laiha hela-fatin permanente iha Dili.

“Iha konseitu no vizaun ida-ne’e mak ita enkuadra tán rezidénsia ba deputadu sira iha fatin ida-ne’ebé besik sede Parlamentu Nasionál hodi garante efetividade servisu no redús ka elimina kustu adisionál ba alojamentu ne’ebé atribui ba deputadu sira agora. Kargu no responsabilidade ne’ebé atribui ba Prezidenti Parlamentu atuál mak hodi kontinua lansa hanoin ida-ne’e ba públiku no halo esforsu atu hahú asaun konkreta ruma,” nia dehan.

Nu’udar líder órgaun soberania ida iha Timor-Leste, presiza iha hanoin boot kona ba funsionamentu no kualidade produtu servisu hosi órgaun soberania ida-ne’e iha futuru. Ita hotu hatene no rekonese situasaun no akontesimentu sira-ne’ebé mosu ona ita-nia órgaun soberania ida-ne’e.

“Mai ha’u, ida-ne’e mak motiva no enkoraja ha’u atu halo estorsu hotu hodi hahú etapa foun no marka diferensa maibé rekonese nafatin estorsu ne’ebé la’o tiha ona no rezultadu balu ne’ebé ita atinje ona Parlamentu Nasionál mak sentru dinámika politika, lejizlasaun no fiskalizasaun no kontrolu ba kualidade dezenvolvimentu iha Timor-Leste no Timor-Leste nia konvivénsia rejionál no intermasionál,” nia hateten.

Nu’udar titular ba órgaun ida-ne’e presiza iha vizaun boot kona-ba órgaun soberania nia sustentabilidade ho kualidade iha futuru ne’ebé kondisiona mós ho infraestrutura no fasilidade adekuadu. Maibé, tenke hahú agora ho vizaun no konseitu estratéjiku ne’ebé lori tempu no rekursu hodi atinje nia meta finál.

“Ne’e duni vizaun no konseitu ne’e sei la finaliza iha tinan ida, rua ka tolu nia laran. Singifika, la’ós mai ha’u ka deputadu sira iha lejizlaura ida-ne’e. Karik, balu sei sai deputadu natatin iha lejizlatura sira tuir mai, ne’e kestaun seluk ida. Ha’u seidauk orienta ema ida atu ko’alia ka trasa alokasaun orsamentu ba asuntu ida-ne’e ka halo planu lansamentu ba projetu ida ne’e,” nia dehan. 

Nia esplika, pontu 3 husi artigu 4, ne’ebé kona-ba sede, patrimóniu no instalasaun Parlamentu Nasionál nian iha Lei nu.12/2017, 24 maiu hatete katak Prezidenti Parlametu Nasional bele determina mudansa ba sede Parlamentu Nasionál ho votu favorável hosi konferénsia reprezentante bankada parlamentár no ratifika iha plenáriu.

Tanba ne’e, nia dehan, nia parte presiza hetan uluk resposta atribuisaun terrenu hosi Ministériu Justisa kona-ba espasu futuru sede Parlamentu Nasionál inklui rezidénsia ba deputadu sira atu hela durante mandatu la’os sai na’in ba rezidénsia ne’e. 

“Estadu mak sai na’in ba uma rezidénsia ne’e. Deputadu sira utiliza de’it ba hela durante sira-nia mandatu, la’ós propriedade privadu deputadu idak-idak nian. Mandatu ramata tenke husik hela-fatin ne’e ba fali deputadu seluk ne’ebé hetan konfiansa nu’udar reprezentante povu. Iha kestaun finanseira no efetividade funsaun lubuk ida mak sai mós konsiderasaun ba koloka rezidénsia deputadu sira besik sede Parlamentu Nasionál,” Prezidente Parlamentu Nasionál, Deputadu Aniceto Guterres esplika.

Notísia Relevante: OJE 2020 Sumba Iha PN Sei Afeita ba Konstrusaun Edifísiu PNTL

Jornalista : Evaristo Soares Martins

Editór       :  Cancio Ximenes

 

HAKEREK NO HATÁN

Please enter your comment!
Please enter your name here