Bispu Dioseze Maliana, Don Norberto Amaral. Imajen/Antonio Goncalves

DILI, 28 abríl 2021 (TATOLI)-Bispu Dioseze Maliana, Don Norberto do Amaral, deside reativa fali no fó ona autorizasaun atu selebra fali misa ba sarani-sira iha igreja sira ne’ebé pertense ba Dioseze Maliana.

Notísia Relevante : Arsebispu Arkidioseze Metropolitana deside reativa misa

“Ba padre, madre no sarani tomak iha Dioseze Maliana, hanoin ba avizu ne’ebé fó sai ona iha loron 12  abríl 2021, katak laiha misa  no nia prazu tetu-an ba COVID-19 durante fulan abríl nia-laran remata ona. Ne’e duni hahú fulan foun ba fulan maiu, ita reativa fali selebrasaun misa no sakramentu, iha parókia, estasaun no sentru Pastorál sira,” Don Norberto hateten liuhosi komunikadu imprensa ne’ebé Agência Tatoli asesu, kuarta ne’e.

Nia hatutan, maske Dioseze Maliana reativa fali selebrasaun misa, maibé sarani-sira tenke mantein nafatin ba regra COVID-19 nian hanesan fase-liman beibeik no mai misa tau máskara, labele kaer-liman; labele rei-liman, hamriik dodok malu ka distansiamentu sosiál no bainhira iha selebrasaun sakramentu ruma lalika halo festa.

Nia husu ba sarani iha Dioseze Maliana tomak katak, bainhira maluk foun ruma ne’ebé mai hosi fatin seluk hanesan, Atambua, Dili ka munisípiu seluk, labele kahur-malu arbiru de’it, maibé haketak malu ho tempu ne’ebé determinadu katak loron sanulu resin lima.

“Husu ba Pároku sira hola atensaun didi’ak regra sira ne’ebé Dioseze Maliana fó sai ne’e. Husu ita hotu nia kolaborasaun  deteta kazu pozitivu ruma karik obedese ba regra ne’ebé Sentru Integradu Jestaun Krize  ne’ebé Governu harii ona, tanba  Hahalok obedese ne’e nu’udár hahalok karidade ida ne’ebé iha folin boot iha ita sarani nia moris,” nia hateten.

Notísia Relevante : Don Basílio deside reativa fali misa iha Dioseze Baucau

Nia husu ba sarani sira iha Dioseze tomak katak labele fiar lia anin ne’ebé dehan katak COVID-19 laiha, maibé  tenke fiar katak COVID-19 ne’e iha tanba COVID-19  hamate ona no hamate daudaun  maluk barak nia moris.

“Nai haraik bensaun mai ita hotu,” Amu Norberto Amaral haktuir.

Jornalista     : Arminda Fonseca

Editór           : Francisco Simões

 

PUBLISIDADEiklan

HAKEREK NO HATÁN

Please enter your comment!
Please enter your name here