Karta komunikadu hosi Arsebispu Arkidioseze Metropolitana Dili, Mgr. Virgílio do Carmo da Silva, SDB.

DILI, 24 abríl 2021 (TATOLI)– Arsebispu Arkidioseze Metropolitana Dili, Mgr. Virgílio do Carmo da Silva, SDB, anunsia no deside reativa hikas selebrasaun liturjia ka misa hahú domingu aban (25/04/2021).

Arsebispu Arkidioseze Metropolitana Dili, Don Virgílio do Carmo da Silva, SDB. Imajen/ Egas Cristóvão

“Ho ida ne’e, ha’u deside atu reativa fali misa ba públiku no selebrasaun sakramentál sira, hahú iha domingu do Bom Pastor, 25 abríl  2021,” Dom Virgílio do Carmo da Silva, SDB hateten liuhosi karta komunikadu ne’ebé Tatoli asesu sábadu ne’e.

Notísia Relevante : Arsebispu suspende atividade misa diária ba parókia sira iha Dili

Desizaun ne’e fó sai hafoin liuhosi enkontru ida ne’ebé organiza hosi Arkidioseze Metropolitana Dili, kinta (22/04), hamutuk ho Pároku no Vigáriu Parokiál-sira hosi Vigararia Dili no reprezentante hosi Ministériu Saúde iha Sentru Integradu Jestaun Krize-Sala Situasaun (CIGC-SS), Odete da Silva Viegas ho ekipa, hodi ko’alia kona-ba situasaun jerál Sars-Cov-2/Covid-19 iha Munisípiu Dili no posibilidade reativa misa ba públiku iha Vigararia  Dili nian.

Bazeia mós iha suspensaun ba konfinamentu obrigatóriu ne’ebé Governu deklara liuhosi Prezidénsia Konsellu Ministru  VIII Governu Konstitusionál iha loron 08 abríl 2021. Konsellu Ministru aprova ona projetu rezolusaun Governu ne’ebé suspende impozisaun konfinamentu domisiliáriu jerál populasaun Munisípiu Dili, to’o nova desizaun Governu no nesesidade espirituál no morál sarani sira-nian atu reativa fali misa.

Maske reativa selebrasaun misa, maibé kontinua kumpre regra ho kondisaun sira tuir mai ne’e:

  1. Kumpre nafatin medida preventiva mak uza máskara, fase-liman ho sabaun ka hand sanitizer no distansiamentu sosiál.

2. Husu Pároku sira atu multiplika misa dominikál hodi evita halibur ema barak.

3. Husu Pároco sira atu limita partisipasaun sarani nian iha selebrasaun sakramentu sira liu-liu iha batizmu no kazamentu.

4. Komunikadu ida-ne’e bele suspende kualkér momentu bainhira situasaun Sars-Cov-2/Covid-19 obriga.

Agradese ba Maromak

Hosi sorin seluk, Pároku São José Ai-mutin, Dili, Emanuel Lelo Talok, CMF, agradese ba Maromak tanba Arsebispu Arkidioseze Dili loke fali ona misa ba públiku no fó hanoin nafatin katak, kazu transmisaun lokál COVID-19 iha rai-laran sei aas.

“Ita sei matan moris neon na’in nafatin no ho tulun Maromak laran luak Nian, ita sei bele liuhosi difikuldade hirak ne’e ho di’ak,” Pe. Emanuel Lelo Talok hateten.

Amu Emanuel Lelo Talok informa ba sarani sira katak se mak laran todan no mós ba sira be saúde ladún di’ak, favór atu lalika tuir misa lai no se mak sente saúde di’ak, bele mai, maibé nafatin kumpre protokolu saúde públiku nian kona-ba prevensaun COVID-19, maka hanesan fase-liman, tuur ka hamriik dook malu metru ida eh resin, uza máskara, hasees-an hosi festa no sempre kontrola saúde rasik, atu di’ak liu mós se bele, simu vasina AstraZeneca atu aumenta imunidade.

Amu haktuir tan, bainhira uza mikrofone ka kaer livru Leccionário hotu, tenke rega kedas ho dezinfeta. Nune’e mós responsavel ba koruu no ba liturjia (Leitores, oradór) se bele maihosi uma-kain ida de’it eh konventu ida.

“Ita sei hawa’in eh habarak misa iha parókia sentru (pusat paroki),” amu informa.

Misa diária sei hala’o iha dadér 06:15 no lokraik 18:00. Misa domenikál sábadu loro-kraik 16:30 no 18:00. Loron domingu tuku 07, 09, 11, 16 no 18. Estasaun no kapela sira husu apár  (mohon disesuaikan), se ema barak, bele hawa’in mós misa. Maibé depende mós ba Na’i lulik.

Kaixa ezmola sira bele responsavel de’it mak  hodi fó ba sarani sira no akólitu bele na’in rua de’it kada misa. Komisaun liturjia fó orientasaun nafatin ba responsavel sira atu prontu pontuál no mós kumpre regra saúde nian.

“Ita sei foku lai ba Santa Misa no selebrasaun sakramentu sira seluk, no sei hein nafatin orientasaun hosi amu bispu no  Conferência Episcopal Timorense (CET),” Amu Emanuel Lelo Talok hateten.

Jornalista   : Osória Marques

Editór          : Francisco Simões

HAKEREK NO HATÁN

Please enter your comment!
Please enter your name here