Don Basílio re-inaugura Parókia Santo António Baucau. Imajen TATOLI/Francisco Simões.

DILI, 17 abril 2021 (TATOLI)—Bispu Dioseze Baucau, Don Basílio do Nascimento, ohin, deside reativa fali no fó ona autorizasaun atu selebra fali misa ba sarani sira iha igreja sira iha Dioseze Baucau.

“Ha’u mai fó hatene ba komunidade sarani sira hotu katak ita-nia selebrasaun liturjika no relijioza sira bele la’o normál fali ona iha igreja sira, sarak respeita nafatin regra bázika sira-ne’ebé ita hotu hatene ona. Atu nune’e, labele fó biban atu moras COVID-19 bele hadaet no habarak-aan liután iha ita-nia Dioseze Baucau,” Don Basílio do Nascimento haktuir liuhosi karta aviza ne’ebé Agência TATOLI asesu, sábadu ne’e.

Don Basílio reativa fali atividade misa iha Dioseze Baucau tanba bazea ba tomada de pozisaun Governu nian, ne’ebé fó sai iha loron 15 liubá katak konfinamentu domisiliáriau ne’ebé deside ba parte lorosa’e (Baucau, Viqueque, Laut’em) ne’e la vigora ona hahú iha loron 17 abríl, no hela serka sanitaria de’it mak sei vigora, atu ema seluk labele la’o hosi munisípiu ida ba munisípiu seluk.

Desizaun Governu nian ne’e mós haktuir, merkadu no komérsiu, no transporte públiku bele sirkula ona maibé husu nafatin ba sarani no komunidade Baucau tomak respeita nafatin regra COVID-19 nian ne’ebé Governu ho Organizasaun Mundiál Saúde (OMS) fó sai no kona ba kuidadu no prevensaun ne’ebé ema hotu tenke tuir.

“Hasa’e nafatin ita harohan no agradesimentu ba ita Aman Maromak, buat hotu nia hun no rohan,” Don Basílio hateten.

Jornalista: Arminda Fonseca

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here