Imajen/Media PR.

DILI, 09 dezembru 2020 (TATOLI)—Orsamentu hosi Ministériu Administrasaun Estatal ho montante millaun $53 aprovadu iha faze espesialidade ho rezultadu votasaun a-favór 43, kontra 0 no abstensaun 0.

“Ho nune’e orsamentu Ministériu Administrasaun Estatal pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária Parlamentu Nasionál, kuarta ne’e.

Montante orsamentu $52,809,097.00 (millaun $53) ne’e inklui orsamentu Sekretariadu Tékniku Administrasaun Eleitorál (STAE) millaun $2,476 no Arkivu no Muzeu Rezisténsia Timorense (AMRT) millaun $3,113.

Bazeia livru Planu Asaun Anuál previstu medida prinsipál setoriál hosi MAE ba tinan fiskál 2021 mak dezenvolve desentralizasaun administrativa, dezenvolve kapasidade institusionál no rekursu umanu, hamosu kondisaun hodi halo instalasaun autarkia lokál ho efetiva, prezerva no konserva istória no kultura Timor-Leste nian liuhosi konservasaun dokumentu istóriku sira.

Nune’e mós asegura administrasaun eleitorál,  kontribui hodi halo redusaun dezigualdade jéneru, hadi’a kondisaun sosiu-ekonómika, governasaun lokál, dezenvolvimentu juventude iha nível munisipál, postu administrativu no suku.

Ministériu Administrasaun Estatal mós sei promove dezenvolvimentu suku no retornu ekonómiku liuhosi PNDS, hamosu sistema toponímia: naran ba dalan sira (nome para as ruas), númeru edifísiu públiku, jardín, parke, largo iha territóriu Timor-Leste nian no promove boa governasaun iha ministériu refere.

Hosi medida prinsipál ne’e, Ministériu Administrasaun Estatal propoin orsamentu $52,809,097 (millaun $53) ba tinan fiskál 2021 ne’e inklui $31,416,640.00 ba implementasaun atividade kona-ba medida planu rekuperasaun ekonómika.

Hosi montante orsamentu $52,809,097.00 ne’e koloka ba saláriu no vensimentu $3,669,695.00 bens servisu $10,874,051.00 kapitál minór $4,764,757.00 kapitál dezenvolvimentu $330,000,00 transferénsia públika $33,170,594.00.

Alokasaun orsamentál kada programa

Alokasaun orsamentál kada programa ho kódigu 412 kona-ba implementasaun polítika jéneru sei gasta rihun $50,040, programa ho kódigu 510 kona-ba boa governasaun no jestaun institusionál sei gasta millaun $8,424,777, programa ho kódigu 511 kona-ba organizasaun urbana rihun $ 90,000, programa no kódigu 512 kona-ba desentralizasaun administrativa millaun $3,054,470.

Nune’e mós programa ho kódigu 513 kona-ba prezervasaun no konservasaun dokumentu ho valór istóriku rihun $354,521, programa ho kódigu 517 kona-ba administrasaun eleitorál sei gasta millaun $3,113,036 no progarama ho kódigu 518 kona-ba dezenvolvimentu suku no retornu ekonómiku báziku millaun $37,722,253.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here