Prezidente Parlamentu Nasionál, Aniceto Longuinhos Guterres Lopez.

DILI, 20 abríl 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, husu deputadu sira atu hatama proposta-alterasaun molok votasaun iha jeneralidade ba alterasaun Orsamentu Jerál Estadu (OJE) 2021.

Notísia Relevante: Komisaun C rekomenda pontu lima ba Governu-pontu 14 ba PN

“Durante oras almosu deputadu sira bele prepara proposta no organiza depois antes debate ohin nian bele submete kedas ba meza,” Aniceto Guterres anunsia liuhosi plenária, tersa ne’e.

Prezidente Parlamentu Nasionál tenke kumprimenta ba rejimenta nune’e hatama proposta molok aprovasaun iha faze jeneralidade.

Deputadu Abel Pires hosi Bankada PLP, husu Prezidente Parlamentu Nasionál atu hanaruk uitoan prazu kona-ba submisaun proposta-alterasaun.

“Ami presiza esforsu lubuk ida, tan ne’e sei haan tempu. Ne’ebé, ha’u husu Prezidente atu konsidera ida-ne’e,” Deputadu Abel Pires dehan.

Nune’e mós Deputada Maria Fernanda Lay hosi Bankada CNRT, krítika maka’as Governu tanba pedidu ho karáter urjénsia maibé la aprezenta dokumentu ba parlamentu.

“Komisaun C foin simu horisehik depois aprova relatóriu no paresér. Ita-boot dehan ami halo proposta, entaun hasai hosi ne’ebé no lori ba ne’ebé, Governu tenke esplika. Governu tenke fó númeru klara katak muda númeru orsamentu hosi ne’ebé ba ne’ebé. Tanba, relatóriu Governu nian la mai ne’e. Tanba ne’e, fó tempu ba ami atu halo proposta,” nia dehan.

Hatán ba preokupasaun hirak ne’e, Prezidente Parlamentu Nasionál argumenta, bainbain meza la presiza husu ba Governu atu pronúnsia no engrega dadus hodi prepara proposta.

“Teknikamente situasaun koordenasaun hanesan ne’e bele la’o iha kualkér oras. Deputadu sira bele koordena ho membru Governu kona-ba proposta-alterasaun ne’e,” nia dehan.

Tuir ajenda ne’ebé iha, debate faze jeneralidade loron ida de’it no debate espesialidade mak loron neen (6).

Tuir rejimentu Parlamentu Nasionál artigu 150 katak, iha diskusaun iha jeneralidade ne’e foka ba prinsípiu no sistema projetu ka proposta de lei idak-idak nian.

Notísia Relevante: Aban, PN debate proposta Orsamentu Retifikativu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here