Primeiru-Ministru, Taur Matan Ruak, hamutuk ho membru Governu sira Partisipa iha debate orsamentu ratifikativu. iha sala plenária PN, tersa (20/04). Imajen TATOLI/Egas Cristóvão.

DILI, 20 abríl 2021 (TATOLI)—Komisaun C ne’ebé trata asuntu Finansa Públika rekomenda pontu lima (5) ba Governu liuhosi alterasaun Orsamentu Jerál Estadu (OJE) 2021 atu kumpre no pontu 14 ba Parlamentu Nasionál atu konsidera.

Notísia Relevante: Alterasaun OJE 2021, prevee millaun $51,9 ba liña frente

“Ami-nia rekomendasaun lubuk ida ba Governu atu kumpre no mós ba Parlamentu Nasionál atu konsidera, liuliu ezekusaun orsamentál,” Prezidente Komisaun C, Deputada Maria Angélica Rangel, ko’alia iha plenária, iha debate alterasaun OJE 2021, tersa ne’e.

Rekomendasaun hosi Komisaun C ne’ebé trata asuntu Finansa Públika rekomenda ba Governu Timor-Leste mak hanesan;

  1. Governu tenke fornese ba Parlamentu Nasionál liuhosi kooperasaun institusionál kona-ba dadus no kálkulu konsukuénsia hosi cheias (banjir), inundasaun no nesesidade finansiamentu ne’ebé mak mitiga efeitu sira.
  2. Tenke halo avaliasaun ba kondisaun ho efetiva hodi atinje objetivu dezenvolvimentu nasionál ne’ebé define ona iha OJE 2021, inklui implementasaun Pakote Rekuperasaun Ekonómika (PRE), no konsidera kondisaun atuál kona-ba konjuntura sanitaria, inklui efeitu ne’ebé provoka kalamidade invade Timor-Leste.
  3. Presiza apoia hosi Parlamentu Nasionál hodi fó prioridade ba medida PRE atubele prevee verba hodi finansia infraestrutura ne’ebé hetan estraga hosi kalamidade dezastre naturál.
  4. Komisaun C husu Governu urjentemente fornese informasaun detallada kona-ba gastu programa cesta bázika ho montante orsamentu millaun $39,1 iha trismestre dahuluk iha tinan fiskál 2021, nune’e mós Governu tenke fundamenta ho razaun hosi implementasaun.
  5. Tenke evita revogasaun iha dotasaun institutu públiku sira, tanba sira la hala’o misaun ne’ebé atribuida ho legalmente.

Aleinde ne’e, Komisaun C mós rekomenda pontu 14 ba Parlamentu Nasionál no pontu importante sira-ne’e mak hanesan; presiza kontrolu ezekusaun orsamentál ne’ebé oras ne’e Governu husu aumenta ba fundu COVID-19 millaun $39,1 no presiza tau atensaun sériu pagamentu ba medida cesta bázika.

Presiza kontrola maka’as orsamentu millaun $51,9 kona-ba suplementu remuneratóriu ba traballadór liña frente sira, presiza klarifika referensiasaun no enumerasaun, no servisu ho autonomia finanseira iha testu orijinál OJE 2021 nian.

Iha rekomendasaun Komisaun C nian ne’e husu ba Parlamentu Nasionál atu aumenta despeza globál iha OJE pur transferénsia adisionál hosi Fundu Petrolíferu ka ho alternativa realokasaun hosi verba sira-ne’ebé prevee iha programa, nune’e finánsia konsekuénsia cheias no inundasaun iha loron 4 abríl.

Komisaun C mós husu Parlamentu Nasionál atu konsidera proposta hosi Governu nian ho montante millaun $225 hodi halo rekuperasaun ba infraestrutura ne’ebé destruida iha loron 4 abríl liubá.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here