iklan

NASIONÁL, EKONOMIA, DILI, HEADLINE, POLÍTIKA

Aban, PN debate proposta Orsamentu Retifikativu

Aban, PN debate proposta Orsamentu Retifikativu

Plenária Parlamentu Nasionál. Imajen Tatoli/António Gonçalves.

DILI, 19 abríl 2021 (TATOLI)—Reprezenta povu iha Parlamentu Nasionál, aban, sei halo debate ho VIII Governu Konstitusionál kona-ba proposta Orsamentu Retifikativu (OR) ho montante millaun $223,8 liuhosi alterasaun Lei Orsamentu Jerál Estadu (OJE) 2021 iha faze jeneralidade.

“Atu informa ba públiku katak, hahú aban loron 20 to’o 27 abríl sei debate Orsamentu Retifikativu no uza loron ida de’it ba faze jeneralidade no loron neen (6) ba espesialidade. Iha debate ne’e sei partisipa hosi Primeiru-Ministru no membru Governu tomak,” Sekretária Meza Parlamentu Nasionál, Deputadu Lídia Norberta dos Santos Martins, informa liuhosi konferénsia imprensa iha uma fukun, segunda ne’e.

Nia hatutan, maske Komisaun C (Finansa Públika) seidauk aprova relatóriu no paresér maibé prazu submisaun to’o de’it iha lorokraik, tanba aban (teresa, 20/04) dadeersan tuku 09.00 obrigatóriu tenke tama ba debate.

Proposta-alterasaun hosi deputadu sira ba iha Orsamentu Retifikativu ne’e, másimu sei aprezenta iha aban lorokraik.

“Aban lorokraik deputadu sira-ne’ebé hakarak halo proposta tenke submete ba meza Parlamentu Nasionál,” nia dehan.

Iha proposta alterasaun hosi deputadu sira, prefere liu ba dezastre naturál tanba submisaun Governu nian prevee de’it ba fundu COVID-19.

“Proposta-alterasaun hosi Governu nian iha orsamentu retifikativu ne’e mak millaun $223,8 maibé ita haree katak inundasaun ne’ebé akontese iha loron 4 abríl, entaun Governu sei halo jestaun ba iha kategoria orsamentál sira atubele atende ba vítima dezastre natural,” nia dehan.

Maibé, Sekretária Meza PN seidauk bele esplika detallu kona-ba orsamentu ba dezastre naturál tanba proposta-alterasaun tenke pronúnsia liuhosi plenária hosi deputadu ka bankada parlamentár sira.

Jornalista: Evaristo Soares Martins

Editór: Cancio Ximenes

iklan
iklan

Leave a Reply

iklan
error: Content is protected !!