Delegadu ONU nian iha Timor-Leste entrega hela karta ba Xanana Gusmão iha Sentru Izolamentu Vera Krús, Dili, kuarta (14/04/2021). Imajen Tatoli/Egas Cristovão

DILI, 14 abríl 2021 (TATOLI)-Reprezentante Organizasaun Nasoins Unidas (ONU-sigla portugés) iha Timor-Leste, kuarta ne’e, hakat to’o Sentru Izolamentu Vera Krús, hodi hato’o karta ONU nian ba  lider karizmátiku, Kay Rala Xanana Gusmão.

Notísia Relevante : Loron-tolu no kalan-rua, Xanana ho família matebian Armindo hein iha Vera Krús

Karta ne’e dirije hosi UN Rezidente Koordenadór iha Timor-Leste, Roy Trivedy,  ne’ebé  lori hosi funsionáriu ka delegadu ONU nian na’in-rua entrega ba Xanana Gusmão iha tuku 09:00 dadeer ne’e.

“Ha’u reprezenta ONU lori gia hosi Organizasaun Mundiál Saúde (OMS) kona-ba oinsá atu prevene virus COVID-19,’’ delegadu ONU nian  ne’e lia tun ba Xanana Gusmão molok entrega karta ne’e.

Delegadu  ONU nian iha TL ne’e informa, karta  refere hato’o mós ba Governu liuhosi Ministériu Saúde.

Xanana Gusmão, informa ba delegadu reprezentante ONU nian iha TL ne’e katak asaun ne’ebé la’o iha sentru izolamentu Vera Krús, nu’udar asaun sívika no la kontra Governu, maibé ezije ba Ministériu Saúde atu hadi’a sira-nia-an iha servisu profisionál kombate surtu COVID-19 iha Timor-Leste.

“Ami la kontra Governu, atu dehan ba Ministériu Saúde, hadi’a uitoan sira-nia-an hodi sai di’ak liu tan,’’ Xanana hateten.

Xanana, esplika povu atu fiar tenke halo sasán ho loloos, nune’e ema hotu bele partisipa iha prevensaun COVID-19.

“Ha’u la’ós la preokupa COVID-19 tanba iha tinan kotuk kedas ha’u la’o uitoan no ha’u mós hakarak ajuda Governu no la impede Governu. Ha’u hakarak apoiu luta kontra COVID-19, maibé halo sasán ne’e ho didi’ak,” Xanana tenik tan.

Notísia Relevante : Xanana-Família matebian kontinua rejeita  entrega mate isin ba Governu  

Jornalista       : Nelson de Sousa

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here