Xanana iha dadeer ne'e. Imajen Tatoli//Florencio Miranda

DILI, 13 abríl 2021 (TATOLI)- Lider Nasionál, Kay Rala Xanana Gusmão no família matebian Armindo Borges (47) kontinua reziste hodi la entrega mate isin ba Governu liuhosi ekipa konjunta forsa tarefa COVID-19.

Governu liuhosi Sala Situasaun, Sentru Jestaun Krize (CIGC,sigla Portugés) ho ekipa pesoál ne’ebé hakoi mate-isin kontamina COVID-19 hamutuk ho Polisia Nasionál Timor-Leste ho karreta funerária to’o iha sala izolamentu Iha tuku 3:30 madrugada, ohin atu tula mate isin ba hakoi tuir regra protokolu COVID-19.

Bainhira ekipa Governu too iha sentru izolamentu, Xanana Gusmão hader hosi toba hodi haruka karreta tula kaixaun ne’ebé prepara hosi família atu para iha portaun sala izolamentu oin hodi satan atu ekipa sira labele foti mate-isin.

“Karreta hakiduk mai para iha portaun oin, tanba ita hakarak mate isin ne’e tenke entrega ba família,” Xanana Gusmão dehan iha sala izolamentu Vera Cruz, Caicoli, dader ne’e.

Governu liuhosi Ekipa Konjuta Forsa Tarefa Prevensun COVID-19 la konsege tama ba sala izolamentu hodi foti mate-isin. “Atu tula mate-isin ba ne’ebé,” Xanana husu ba ekipa konjunta ne’e.

Hafoin, rona Xanana ko’alia, ekipa konjunta mós deside fila hosi sentru izolamentu ba SS-CIGC, Iha sentru Konvesaun Dili.

Tuir observasaun Jornalista TATOLI iha tereñu nota katak Polisia Nasionál Timor-Leste mós kontinua asegura Iha fatin izolamentu ne’ebé situasaun la’o hakmatek.

Iha sala izolamentu ne’e, família matebian hamutuk ho Deputadu no Deputada balun hosi Partidu CNRT tuba metin, hamutuk ho Xanana Gusmão hodi hein desizaun ikus hosi Governu.

Notísia relevante:La entrega mate-isin, Xanana deside toba iha sentru izolamentu

 Jornalista: Florencio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here