Lider Karizmátiku, Kay Rala Xanana Gusmão, hein hela iha Sentru Izolamentu Vera Krús, Dili. Imajen TATOLI/Egas Cristóvão.

DILI, 14 abríl 2021 (TATOLI) -Loron-tolu no kalan-rua ona, hosi segunda to’o kuarta (12-14/04), Komandante Em-Xefe FAILINTIL,   Kay Rala Xanana Gusmão, hamutuk ho família matebian Armindo Borges (47) mantein iha Sentru Izolamentu Vera Krús nian hodi hein desizaun Governu nian kona-ba mete-isin Armindo Borges nian ne’ebé deskonfia mate tanba COVID-19.

Notísia Relevante : Xanana Gusmão kontinua toba iha sentru izolamentu Vera Cruz

Xanana ho família matebian Armindo Borges hein atu Governu bele entrega mate-isin ba  Xanana no família atu ba hakoi tuir lisan sira-nian. Maske nune’e, to’o kuarta dadeer ne’e, seidauk iha desizaun ruma hosi Governu atu entrega mate-isin ba família.

Tuir  observasaun Agência Tatoli nian iha  Sentru Izolamentu Vera Krús, situasaun hakmatek no kontroladu no pesoál seguransa sira hosi Polísia Nasionál Timor-Leste ne’ebé destaka halo seguransa iha fatin ne’eba sei mantein hodi asegura movimentu sira.

Dezde kedas segunda to’o tersa horiseik, reprezentante Governu nian, liuhosi Ministra Saúde Odete Maria Freitas Belo, inklui Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, ba ona konsola Xanana atu koopera ho Estadu hodi entrega situasaun ne’e ba Governu atu rezolve tuir protokolu saúde nian no husu mós Xanana fó fiar ba Lere rasik atu rezolve situasaun ne’e, maibé Xanana mantein nia pozisaun hodi dehan, solusaun maka entrega mate-isin Armindo nian ba Xanana ho família lori ba hakoi iha semitériu ne’ebé família hakarak la’ós ba Semitériu COVID-19 iha Metinaro.

Matebian Armindo Borges (47) hakotu iis iha domingu (11/04), tanba moras komplikadu hanesan stroke no  rezulta teste swab hosi ekipa saúde nian hatudu mós matebian pozitivu COVID-19, nune’e hosi forsa-tarefa servisu  Sentru Integradu Jestaun Krize-Sala Situasaun (CIGC-SS) ho Ministériu Saúde  sei halo’ot mate isin tuir  protokolu saúde iha semitériu COVID-19 nian iha Metinaro. Maibé, Xanana Gusmão hamutuk ho família defende katak matebian hakotu iis tanba moras komplikadu no la’ós tanba moras COVID-19, nune’e husu  hasai mate isin hodi entrega ba família mak  halo prosesu funerál.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here