Estudante eskola Ensino Basico Central (EBC) 1,2,3 Fleicha, Postu Administrativu Maubisse, Munisípiu Ainaro. Imajen Tatoli/Egas Cristóvão.

DILI, 13 abríl 2021 (TATOLI)—Ministériu Edukasaun Joventude no Desportu (MEJD), sei suspende programa merenda eskolár, iha munisípiu ulau ne’ebé oras ne’e ativu hela ho prosesu aprendizazen ho aula prezensiál.

Diretór Nasionál Asaun Sosiál Eskolár (DNASE), Joaquim Martins, hateten MEJD sei foti desizaun hodi suspende programa ne’e tanba númeru pozitivu COVID-19, kontinua aumenta iha Munisípiu sira-ne’e.

Notísia relevante:MAE prevee millaun $15 ba Merenda Eskolár

“Ita hetan ona orientasaun hosi Ministru, katak tempu besik sei hapara provizóriu programa merenda eskolár atu prevene transmisaun COVID-19 ba labarik-sira,” Joaquim Martins hateten ba jornalista-sira iha MEJD Vila Verde, tersa ne’e.

Munisípiu ulau ne’ebé kontinua ensinu aprendizazen prezensiál mak hanesan Manatuto, Ainaro, Bobonaro, Covalima, Manufahi, Ermera, Aileu no Rejiaun Administrativa Espesiál Oe-cusse Ambeno (RAEOA). 

Tuir observasaun MEJD katak, atividade aula prezensiál iha Munisípiu ualu ne’e kumpre hela protokólu saúde ne’ebé fó-sai hosi Organizasaun Mundiál Saúde (OMS), no Ministériu Saúde (MS), maibé sei hola desizaun atu hapara provizóriu programa merenda eskolár.

Entretantu, Ministériu Administrasaun Estatál (MAE) prevee millaun $15 hosi Orsamentu Jerál Estadu (OJE) 2021 ba merenda eskolár iha territóriu tomak, no transfere ona ba konta bankária eskola ida-idak iha fulan fevereiru.

Antes ne’e, MEJD liuhosi DNASE identifika ona estudante hamutuk 320.539 iha territóriu tomak ne’ebé asesu hikas ba Programa Merenda Eskolár, tanba durante situasaun COVID-19 paradu.

Totál estudante 320.539 ne’ebé iha, kompostu hosi Edukasaun Pré-eskolár Públiku Katólika 25.356 hosi eskola 430 no Ensinu Báziku 295.183 hosi eskola 1.268 iha munisípiu 12 inklui RAOEA.

Notísia relevante:SEML iha rihun $96-resin ba merenda eskolár

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here