Estudante Colégio Santo Inácio de Loiola, Casait-Liquiça, fase liman antes tuir prosesu aprendizazen. Imajen Tatoli/António Gonçalves.

DILI, 19 marsu 2021 (TATOLI)—Serbisu Edukasaun Munisípiu Liquiça (SEML), hetan ona transferénsia orsamentu merenda eskolár ho montante rihun $96.860, hosi Ministériu Administrasaun Estatál (MAE), Dirasaun Nasionál Finansa Munisípiu, ba estudante 17.611 mai hosi eskola 67.

Diretór SEML, Zito António de Oliveira da Costa, hateten programa merenda eskolár ne’ebé sei implementa iha de’it loron efetivu 28, tanba ne’e sei realiza iha fulan abríl.

Notísia relevante:MAE prevee millaun $15 ba Merenda Eskolár

“Merenda eskolár ba Munisípiu ne’e sei implementa bazeia ba programa ne’ebé trasa ona. Ne’e duni, kada estudante sei hetan 0,25 centavu tanba Governu seidauk iha kbi’it atu apoia fos ba eskola-sira,” Zito António, hateten ba jornalista Agência Tatoli via telefónika, sesta ne’e.

Hosi totál estudante 17.611 ne’e, nia esplika, kompostu hosi estudante Ensinu Báziku Jerál 16.382 ho totál orsamentu ne’ebé alokadu hamutuk $91.101 no estudante Ensinu Báziku Privadu hamutuk 120, hetan alokasaun $660.

Alende ne’e, iha mós Edukasaun Pré-Eskolár Públiku (EPEP) ho totál estudante 1.109, ne’ebé hetan alokasaun orsamentu $699.

“Ha’u foin simu totál eskola Edukasaun Pré-Eskolár, Ensinu Báziku Jerál no Públiku hamutuk 67 ho-ninia detallu ha’u sei hein hela parte eskola-sira atu aprezenta,” nia esplika.

Entretantu, prosesu ensinu aprendizazen iha Munisípiu ne’e kontinua hanesan baibain, no parte SEML husu nafatin ba eskola-sira atu mantein kumpre regra-sira protokólu saúde, hodi prevene an hosi COVID-19.

Notísia relevante:Estudante 320.539 sei asesu hikas Merenda Eskolár

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here