Labarik sira hela iha sentru evakuasaun Don Bosco Comoro. Imajen/Facebook: FMA Tatoli Ksolok Evangellu.

DILI, 12 abril 2021 (TATOLI)—Komisária Komisaun Nasionál Direitu Labarik (KNDL), Dinorah Granadeiro, informa Governu liuhosi Ministériu Solidariedade Sosiál no Inkluzaun (MSSI) rejistu ona labarik afetadu dezastre naturál hamutuk 1.209 ne’ebé oras ne’e hela iha sentru evakuasaun sira iha Dili.

Notísia Relevante: Labarik 250 hela iha sentru evakuasaun Don Bosco Comoro

“Ita hamutuk ho Ministériu Solidariedade Sosiál no Inkluzaun (MSSI) rejistu na labarik afetadu ba dezastre naturál hamutuk 1.209 ne’ebé hela ka refujia sentru evakuasaun hamutuk 23 iha kapitál Dili,” Dinorah Granadeiro informa ba Agencia TATOLI, liuhosi telefónika, segunda ne’e.

Hosi totál labarik 1.209 ne’e inklui mós ho labarik ema ho defisiénsia sira, no labarik barak mak hetan trauma no tauk ba akontesimentu ne’e. Tanba ne’e, SSI hamutuk ho KNDL no UNICEF tau hanoin hamutuk atu kria programa ida hodi bele anima labarik sira iha sentru evakuasaun.

“Programa ida agora ami estabelese servisu hamutuk KNDL ho MSSI no UNICEF kontinua halo animasaun ba labarik sira. Iha animasun ne’e halimar jogu labarik nian inklui distribui materiál labarik nian hanesan halo dezenu, nune’e bele halakon stress no trauma ne’ebé mak sira enfrenta iha akontesimentu dezastre naturál ne’e,” nia esplika.

Nia dehan, ohin ekipa hosi KNDL, MSSI no UNICEF hahú distribui no entrega ona materiál labarik nian ba sentru evakuasaun sira iha Dili, no tuir planu aban hahú implementa programa animasaun ne’e ba labarik sira.

Ekipa halo ona distribuisaun materiál labarik nia ba iha sentru evakuasaun sira hanesan Cruz Vermelha Timor-Leste (CVTL), Madre Kanosiana Balide, João Paulo II Comoro, Dom Bosco Comoro, Liceu UNTL, Parókia Hera, INFORDEPE Balide, Madre Hera, MSSI kotuk, Sentru Hera, Lahane, Ministériu Finansa, kapela Metiaut, Eskola Bázika Católica Metiaut, Eskola Bázika Católica Saburaka laran, Sentru Formasaun Filha Maria Auxiliadora Comoro, Eskola Bázika Católica Teresinha doenino Jesus, Fundasaun Ahisaun no fatin seluk tan.

“Ita seidauk iha dadus espesífiku labarik nian iha kada sentru evakuasaun hirak ne’e. Tanba ne’e, liuhosi programa animasaun, nune’e ita bele hatene labarik hira loloos iha kada sentru evakuasaun sira,” nia dehan.

Nia haklaken, liuhosi programa animasaun ne’e mak iha esperansa boot bele hamenus labarik sira ne’ebé stress, tanba ho razaun mosu COVID-19 ne’ebé labarik sira labele asesu ba eskola no daruak inundasaun ne’e mós halo labarik sira labele fila-fali ba sira-nia uma.

Notísia Relevante: Labarik kuaze na’in-95 evakua-hela iha Konventu Kanosianu Hera

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here