Vítima dezastre naturál ne’ebé refujia iha CFP-DBC, segunda (05/04/21). Imajen Tatoli/Egas Cristóvão.

DILI, 12 abril 2021 (TATOLI)—Diretór Centro Formação Profissionál (CFP) Don Bosco Comoro, Irmão Adriano de Jesus, SDB, informa vítima dezastre naturál hamutuk 2.000 mak oras ne’e hela iha sentru evakuasaun salaun Sentru Formasaun Profisionál Don Bosco Comoro. 

Notísia Relevante: CFP-DBC rekomenda Governu kria lalais kondisaun ba vítima dezastre naturál

Hosi totál hirak ne’e, nia hatutan, sira-nia parte konsege rejista labarik sira hosi idade 0-5 ne’ebé sai vítima ba inundasaun ne’e hamutuk na’in-250.

“Vítima sira-ne’ebé evakua mai iha ne’e besik 2.000 entaun hosi númeru ne’e iha mós labarik kiik-oan hahú hosi idade 0-5 hamutuk 250 mak hela iha salaun Sentru Formasaun Profisionál Don Bosco Comoro ne’e,” Irmão Adriano de Jesus, SDB, informa ba Agência TATOLI, segunda ne’e.

Nia informa, foufoun vítima sira evakua ba salaun Don Bosco haree labarik ki’ik-oan sira presiza tebes fatin ne’ebé seguru, entaun família no grupu sira-ne’ebé mai halo vizita husu sira-nia ajuda atu bele ajuda hola kulxaun ida-ne’ebé mahar fó vítima sira hodi uza.

“Ema ne’ebé ami husu ajuda mak hanesan profesora portugés, antigu alunu Don Bosco no ema laran luak balun. Bainhira sira mai halo vizita haree kondisaun no observa rasik, sira fila-fali ba sosa kulxaun sira mai entaun ami fó haree liu ba bebé ki’ik-oan sira,” nia dehan.

Liga ba saúde públiku labarik sira-nian iha sentru evakuasaun, nia informa, desde akontese inundasaun ne’e, vítima sira ne’ebé evakua mai iha Sentru Don Bosco Comoro ne’e, parte saúde sira loro-loron mai halo atendimentu hodi fó konsulta ba vítima sira inklui labarik ki’ik-oan no inan isin-rua sira.

“Kona-ba saúde públiku labarik sira-nian, domingu ne’e kedas sira loro-loron iha ne’e, hodi fó konsulta ba labarik sira no inan isin-rua sira. Hosi rezultadu ne’e, ita haree katak labarik ki’ik-oan sira balun me’ar no isin-manas. Maibé, ami koordena ho madre Salesiana sira iha Comoro ne’e, entaun labarik-ki’ik, bebé no inan isin-rua ne’ebé atu partus ona, ami haruka ba hotu iha Madre sira-nian. Entaun, ema ne’ebé ami haruka ba Madre sira purvolta família 20 hanesan ne’e,” nia dehan.

Ba vítima sira ne’ebé daudauk ne’e sei iha Salaun Don Bosco Comoro Dili, nia dehan, loro-loron grupu animasaun sira sempre ba hamaluk vítima sira, liuliu ba labarik sira hanesan kanta, pinta, no joga halimar.

Nia afirma, hosi 04-08 abril, sentru evakuasaun iha CFP-DBC rejistu vítima dezastre naturál uma-kain hamutuk besik 500. Hosi númeru ne’e iha uma-kain 100 mak fila ona ba sira-nia uma no sira-ne’ebé sei hela iha sentru ne’e besik 2.000.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here