Vítima dezastre naturál evakua no hela iha sentru evakuasaun Konventu Padre Kanosianu sira-nian iha Hera, Dili. Imajen/Espesiál.

DILI, 05 abril 2021 (TATOLI)—Komisária Nasionál Direitu Labarik (KNDL), Dinorah Granadeiro, informa tanba udan ho intensidade boot provoka inundasaun kuaze iha kapitál Dili, iha domingu madrugada (04/04), halo vítima barak mak evakua provizóriu ba buka fatin mahon hodi husik hela sira-nia hela fatin.

Notísia Relevante:  Dezastre naturál iha TL, ema 21 lakon vida

Dinorah Granadeiro hatutan, daudaun ne’e KNDL simu ona dadus provizóriu liuliu kona-ba vítima labarik sira-ne’ebé evakua hamutuk ho sira-nia inan-aman ne’ebé oras ne’e hela iha sentru evakuasaun Konventu Padre Kanosianu sira-nian iha Hera, Dili.

“Ita seidauk hetan dadus labarik espesífiku hosi sentru evakausaun hotu maibé ita foin simu dadus hosi Konventu Padre Kanosianu Hera nian, labarik kuaze na’in-95,” Dinorah Granadeiro hateten ba Ajénsia TATOLI, liuhosi telefónika, segunda ne’e

Komisária ne’e hateten, iha tempu badak nia parte bele simu ona dadus labarik sira-nian ne’ebé evakua no hela iha sentru evakuasaun sira iha kapitál Dili nian, nune’e KNDL bele haruka ba MSSI hodi fasilita ai-han ba sira.

Ho situasaun ida-ne’e, komisária ne’e hateten, daudaun ne’e parte KNDL ho Ministériu Solidariedade Sosiál no Inkluzaun (MSSI) halo koordenasaun atu fó apoiu solidariedade ba vítima dezastre naturál ne’e.

“Iha koordenasaun ne’e ita husu kedas apoiu ba parte MSSI atu ajuda ba vítima sira-ne’ebé hetan dezastre naturál no evakua ona iha Sentru Dom Bosco Comoro, konventu madre sira-nian iha Dili laran inklui edifísiu ministériu balun nian, tanba ne’e presiza apoiu ai-han ba sira,” Dinorah hateten.

Koordenasaun ho MSSI ne’e, nia dehan, KNDL sei prepara dadus no MSSI mak sei fó apoiu no mós hetan fasilita hosi Plan Internasional. Nia dehan, Planu Internasionál fasilita matérial no ai-han nutritivu ba labarik sira nune’e bele saúde di’ak iha situasaun dezastre naturál ne’e.

Nia dehan, maske fizikamenete la mosu no la ba vizita iha sira-nia fatin evakua maibé KNDL hamutuk MSSI inklui Plan Internasional kontinua halo preparasaun dadus no ai-han hodi fó apoiu umanitária ba sira.

“Ha’u rasik horisehik ba haree família ne’ebé lakon inan ho oan ka mate dala ida, iha Aldeia Moris Foun, Suku Kampung Baru nian, no hodi fó apoiu kiik-oan ba sira hodi haloot ho di’ak inklui ita fasilita sira viajen hosi Dili ba sira-nia moris fatin Bobanaro,” nia dehan.

Nia informa, situasaun ne’e difísil tebes maibé nia hakarak enkoraja inan-aman atu fuan boot ba situasaun ne’ebé sira enfrenta, nune’e husu atu nafatin kuidadu oan sira bainhira tempu udan no anin.

Dinorah hateten, dezastre naturál ne’e la’ós afeta ba ema lakon ka lakon materiál maibé depois udan tiha sei mai ho moras tanba impaktu hosi udan been, taho, ka rai-rahun sira hodi afeta labarik sira bele hetan moras.

KNDL husu Governu fó apoiu

Aleinde ne’e, Dinorah Granadeiro husu nafatin ba Governu atu fó apoiu solidariedade ba komunidade afetadu sira ba inundasaun ne’ebé oras ne’e hela iha sentru evakuasaun sira iha Dili laran ne’e.

“Ita husu Governu atu kontinua tau atensaun ba situasaun ida-ne’e liuliu oinsá mak kontinua apoiu ita-nia komunidade afetadu sira atu nune’e sira bele sente duni katak sira iha duni mahon ne’ebé fó hela atensaun ba sira iha situasaun hanesan dezastre naturál ne’e,” nia dehan.

Tanba, nia dehan, liuhosi fó atensaun no apoiu umanitáriu mak povu bele iha esperansa fali hosi dazastre naturál ne’ebé sira enfrenta iha loron domingu, loron 04 abril tinan 2021 ne’e.

Komisária ne’e hateten, dezastre naturál kuaze kapitál Dili infrenta, tanba ne’e husu Governu atu foti asaun ida-ne’ebé lalais, nune’e bele fasilita sira-nia ai-han no materiál iha sentru evakuasaun sira-ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here