Komodoro Donaciano Costa Gomes Pedro “Klamar Fuik” halo koordenasaun ho Kay Rala Xanana Gusmão kona-ba mate-isin COVID-19. Imajen Tatoli/Egas Cristóvão.

DILI, 12 abríl 2021(TATOLI)—Líder karismátiku Kay Rala Xanana Gusmão, ohin dadeer to’o agora, hamutuk ho família matebian Armindo Borges (47) hosi Suku Manu-Tasi, Postu Administrativu Ainaro, Munisipiu Ainaro, ne’ebé hakotu iis tanba sofre COVID-19, ezije Governu atu lori hikas matebian nia mate-isin ba nia rezidénsia hodi haloot tuir Timor-Leste nia tradisaun.

Notísia Relevante: CIGC husu Xanana kontribui hakoi mate-isin tuir protokolu COVID-19

Iha lorokraik kuaze tuku 17.05, Komodoro Donaciano Costa Gomes Pedro “Klamar Fuik” halo kedas koordenasaun ho Kay Rala Xanana Gusmão hodi bele hetan solusaun ruma ba asuntu refere maibé Xanana la konvensidu.

“Siénsia saida mak konvense ha’u. Ami povu ne’e kompreensaun menus,” Xanana informa ba Klamar fuik, iha Vera Cruz, segunda ne’e.

Iha biban ne’e, Xanana informa ba Klamar Fuik hodi hateten nia (Xanana) tama sai Munisípiu ne’e ho objetivu atu ajuda Governu hanesan agora ne’e.

“Ha’u sai tama munisípiu objetivu ajuda Governu, maibé hanesan agora ne’e, deskulpa,” Xanana hateten.

Tuir observasaun, molok Pedro Klamar fuik to’o iha izolamentu, Xanana Gusmão kontinua alerta hodi bolu ambulánsia ne’ebé atu tula mate-isin refere atu lori hikas ba matebian nia hela fatin.

“Ambulánsia iha-ne’ebé ona,” Xanana hakilar hodi husu.

Tuir Agência Tatoli nia observasaun iha terrenu nota katak, aredór Sentru Saúde Vera Cruz parte PNTL asegura metin. Maibé, hosi parte estrda boot, besik edifísiu Administrasaun Munisipál Dili, ema lubu boot ida kontinau halo protesta hodi hakilar no situasaun ne’e mós hamosu engarafamentu iha área refere.

Notísia Relevante: Ministra Saúde husu Xanana atu fiar COVID-19

Jornalista: Evaristo Soares

Editór: Cancio Ximenes

HAKEREK NO HATÁN

Please enter your comment!
Please enter your name here